ডিজিটেল ডেস্কঃ গৱেষক ছাত্ৰী দেৱাংগনা কলিতাৰ বিৰুদ্ধে দিল্লী আৰক্ষীয়ে চতুৰ্থ খন এজাহাৰ দাখিল কৰি গোচৰ ৰুজু কৰিছে৷ ২০১৯ বৰ্ষত নৱেম্বৰ-ডিচেম্বৰ মাহত নাগৰিকত্ব আইন বাতিলৰ দাবীত দিল্লীত প্ৰতিবাদ সাব্যস্ত কৰাৰ সময়ত সংঘটিত হিংসাত্মক কাৰ্যত জড়িত থকাৰ অভিযোগত দেৱেংগনা কলিতাৰ বিৰুদ্ধে চতুৰ্থ খন এজাহাৰ দাখিল কৰিছে৷

ইতিমধ্যে দেৱেংগনা কলিতাৰ বিৰুদ্ধে তিনিটা গোচৰ ৰুজু কৰিছিল দিল্লী আৰক্ষীয়ে৷ উক্ত তিনিওটা গোচৰত দেৱংগনাই জামিন লাভ কৰিছে। এইবাৰ
দেৱংগনাৰ বিৰুদ্ধে বেআইনী কাৰ্যকলাপ প্ৰতিৰোধ আইন চমুকৈ UAPAৰ অধিনত গোচৰ ৰুজু কৰা হৈছিল। দেৱংগনাৰ গৱেষক সহপাঠী নটাচা নৰৱালৰ বিৰুদ্ধে একেই অভিযোগত UAPAৰ অধিনত গোচৰ ৰুজু কৰা হৈছে। সচৰাচৰ দেশৰ সাৰ্বভৌমত্বৰ প্ৰতি ভাবুকি আহিলেহে এই আইনৰ অধিনত গোচৰ ৰুজু হয়।

দিল্লী আৰক্ষীয়ে প্ৰতিবাদৰ সময়ত জাফৰবাদ মেট্ৰ ষ্টেচনত সংঘটিত হিংসাত্মক কাৰ্যত জড়িত থকাৰ অভিযোগ উত্থাপন কৰিছে এওলোকৰ বিৰুদ্ধে। মুঠ ১২গৰাকী লোকৰ বিৰুদ্ধে হিংসাত্মক কাৰ্যৰ সৈতে জড়িত থকাৰ অভিযোগ আনিছে আৰক্ষীয়ে। ইতিমধ্যে দিল্লী আৰক্ষীয়ে আটাইকেইজনৰ বিৰুদ্ধে চাৰ্জশ্বিট দাখিল কৰিছে আদালতত। দেৱংগনা কলিতা দিল্লীস্থিত জৱাহৰলাল নেহেৰু কেন্দ্ৰীয় বিশ্ববিদ্যালয়ৰ এগৰাকী গৱেষক ছাত্ৰী৷