নতুন দিল্লীঃ প্ৰধানমন্ত্ৰী নৰেন্দ্ৰ মোদীয়ে আহত সৈনিকৰ স্বাস্থ্যৰ বুজ ল’বলৈ যোৱা সময়ত তোলা ফটোক লৈ বিতৰ্কৰ সূত্ৰপাত হোৱাৰ পিছতে ভাৰতীয় সেনাবাহিনীয়ে সংবাদ মাধ্যমলৈ বিবৃতি প্ৰেৰণৰ জৰিয়তে বিষয়টো সন্দৰ্ভত স্পষ্ট কৰি দিছে। বিবৃতিটোত স্পষ্টকৈ কোৱা হৈছে যে ছ’চিয়েল মিডিয়াত যিধৰণে একাংশ লোকে প্ৰধানমন্ত্ৰী মোদী আৰু আহত সেনা জোৱানসকলৰ ফটোক লৈ মন্তব্য কৰিছে সেয়া সম্পূৰ্ণৰূপে অসত্য আৰু অপপ্ৰচাৰ।

‘ফটোত দেখা পোৱা হোৱা হলটো হৈছে জৰুৰী অৱস্থাত ৰোগীৰ সংখ্যা বৃদ্ধি পোৱাৰ ফলত পৰিৱৰ্ধন কৰা হাস্পতাল বেড আৰু এয়া চিকিৎসালয় চৌহদৰেই অন্তৰ্গত। ক’ভিড-১৯ৰ পৰিপ্ৰেক্ষিতত বহু ৱাৰ্ড আইছ’লেশ্যন ৱাৰ্ডলৈ সলনি কৰিবলগীয়া হৈছে। সেয়ে সাধাৰণতে প্ৰশিক্ষণৰ বাবে ব্যৱহাৰ কৰা চিকিৎসালয়খনৰ এই অডিঅ’ আৰু ভিডিঅ’ হলটোকেই বৰ্তমান জেনেৰেল ৱাৰ্ডলৈ ৰূপান্তৰিত কৰা হৈছে।’-বিবৃতিটোত কৈছে ভাৰতীয় সেনাই।

‘গালৱানৰ আহত বীৰ সেনাসকল যাতে কৰ’না ৰোগীৰ সংস্পৰ্শলৈ আহিবলগীয়া নহয় তাৰ বাবে এই কনফাৰেন্স হলত সুকীয়াকৈ চিকিৎসা কৰি থকা হৈছে। এই একেই স্থানতে কেইদিনমান পূৰ্বে সেনাপ্ৰধান এমএম নাৰৱানেও আহত সেনাসকলক সাক্ষাৎ কৰি সাহস যোগাইছে।’-ছ’চিয়েল মিডিয়াত চলা অনাহক বিতৰ্কৰ অৱসান আশা কৰি বিবৃতিটোত এইদৰে উল্লেখ কৰিছে ভাৰতীয় সেনাই।

আনহাতে, ফটোকেইখনত চিকিৎসাধীন সেনাজোৱানকেইজন যদি আঘাতপ্ৰাপ্ত আছিল তেন্তে বেণ্ডেজ আদি নোহোৱাকৈ কেনেকৈ সুস্থ লোকৰ দৰে বহি থাকিব পাৰিছে বুলি ভিন্নজনে কৰা প্ৰশ্নক লৈ মন্তব্য কৰিছে মেজৰ নৱদ্বীপ সিঙে। তেওঁ লিখিছে, ‘এইসকল সেনা গুৰুতৰভাৱে আহত হৈ চিকিৎসাধীন হৈ থকা নাই। তেওঁলোকৰ আঘাতসমূহ ভাাল হৈ উঠিছে আৰু এতিয়া সম্পূৰ্ণৰূপে আৰোগ্য লাভ কৰালৈকে তাত ৰখা হৈছে।’

এনেদৰেই শনিবাৰে ভাৰতীয় সেনাই স্পষ্ট কৰি দিয়ে যে কংগ্ৰেছ দলৰ লগতে আন বিৰোধী দল তথা মোদীৰ সমালোচকসকলে কালিৰে পৰা শ্বেয়াৰ কৰি থকা প্ৰধানমন্ত্ৰী মোদীৰ লেহৰ ফটোসমূহ ফেক ফটো নহয়। লগতে এয়া চমক সৃষ্টিৰ বাবে কৰা কোনো কৃত্ৰিম ফটো ছেছনো নহয়। এয়া প্ৰকৃততেই এখন চিকিৎসালয়ৰেই ফটো আৰু উক্ত চিকিৎসালয়খনেৰই এটা কনফাৰেন্স হলত কৰ’নাৰ বাবে হোৱা ৰোগীৰ ভিৰৰ পৰিপ্ৰেক্ষিতত গালৱানত মজলীয়াভাৱে আঘাতপ্ৰাপ্ত সেনাসকলক চিকিৎসা কৰি থকা হৈছে।