বিশ্বনাথঃ বিশ্বনাথ বিধানসভা সমষ্টিৰ বিশ্বনাথ আৰু সাকোমঠা মৌজাৰ ৩৮গৰাকী গাঁওবুঢ়াক বৃহস্পতিবাৰে স্মাৰ্টফোন প্ৰদান কৰে বিশ্বনাথৰ বিধায়ক প্ৰমোদ বৰঠাকুৰে। বিশ্বনাথ চাৰিআলিস্থিত বিশ্বনাথ জিলা গাঁওবুঢ়া সন্থাৰ কাৰ্যালয়ত অনুষ্ঠিত এখন সভাত বিধায়ক বৰঠাকুৰে স্মাৰ্টফোনসমূহ বিতৰণ কৰে৷

গাঁওবুঢ়া-প্ৰশাসনৰ যোগাযোগ উন্নত কৰাৰ স্বাৰ্থত গাঁওবুঢ়াসকলক স্মাৰ্ট ফোন প্ৰদান কৰা বুলি উল্লেখ কৰে বিধায়ক বৰঠাকুৰে। বিশ্বনাথ জিলাত মুঠ ২১৭গৰাকী গাঁওবুঢ়া আছে৷ এই আঁচনিৰ জড়িয়তে ২১৭গৰাকী গাঁওবুঢ়াকে পৰ্যায়ক্ৰমে মোবাইল বিতৰণ কৰা হ’ব বুলি জানিবলৈ দি সদৌ অসম গাওঁ বুঢ়া সন্থাৰ বিশ্বনাথ জিলা সমিতিৰ কাৰ্যালয়ৰ আন্তঃগাঁথনি উন্নয়নৰ বাবে বিধায়ক পুজিৰ পৰা ২ লাখ টকা আগবঢ়োৱাৰ কথা ঘোষণা কৰে বিধায়ক প্ৰমোদ বৰঠাকুৰে৷

বিশ্বনাথৰ ৰাজহ চক্ৰ বিষয়া বিশ্বজিৎ শইকীয়া, সদৌ অসম গাওঁবুঢ়া সন্থাৰ সাংগঠনিক সম্পাদক পংকু বৰা, সন্থাৰ বিশ্বনাথ জিলা সমিতিৰ সভাপতি ৰামনাথ টেৰন, দিগন্ত হাজৰিকা, চেনিৰাম ক্ৰু, ৰমেশ ৰাৱতীয়া, পুতুল বৰা, জ্যোতিষ ভূঞা, অতুল খাউণ্ড, ৰঙাই ভূঞা, কৃষ্ণ বৰা, গংগা কাৰ্কীৰ উপস্থিতিত গাঁওবুঢ়াসকলক স্মাৰ্টফোন বিতৰণ কৰা হয়৷