ফাৰহান লস্কৰঃ আজি দুলীয়াজানস্থিত অসম গেছ কোম্পানী লিমিটেডৰ হীৰক জয়ন্তী উদযাপন কৰে৷ হীৰক জয়ন্তী উদযাপনৰ কাৰ্যসূচীত মুখ্যমন্ত্ৰী ড০ হিমন্ত বিশ্ব শৰ্মাই অংশ লয়৷ কেন্দ্ৰীয় পেট্ৰ’লিয়াম আৰু প্ৰাকৃতিক গেছ দপ্তৰৰ ৰাজ্যিক মন্ত্ৰী ৰামেশ্বৰ তেলী, মন্ত্ৰী চন্দ্ৰমোহন পাটোৱাৰী, সঞ্জয় কিষাণ, অসম গেছ কোম্পানী লিমিটেডৰ অধ্যক্ষ বলিন চেতিয়া, দুলীয়াজান নুমলীগড় পাইপলাইন লিমিটেডৰ অধ্যক্ষ ৰূপম গোস্বামী উপস্থিতিত মুখ্যমন্ত্ৰী ড০ হিমন্ত বিশ্ব শৰ্মাই অসম গেছ কোম্পানী লিমিটেডৰ বিষয়-ববীয়া, কৰ্মচাৰীক সম্বোধন কৰি কেইবাটাও গুৰুত্বপূৰ্ণ মন্তব্য প্ৰদান কৰে৷ ১৯৬২ চনত স্থাপিত অসম গেছ কোম্পানী লিমিটেডে যোৱা ৬০ বছৰত ৰাজ্যখনৰ ঔদ্যোগীকৰণত যথেষ্ট অৰিহণা যোগাইছে বুলি কয় মুখ্যমন্ত্ৰীয়ে। অসম গেছ কোম্পানী লিমিটেড প্ৰতিষ্ঠা আৰু আজিও সফলতাৰে ইয়াৰ কাৰ্যপন্থা অব্যাহত ৰখাৰ ক্ষেত্ৰত দূৰদৰ্শী পদক্ষেপ গ্ৰহণ কৰাৰ বাবে ৰাজ্যৰ মুখ্যমন্ত্ৰীগৰাকীয়ে অতীত আৰু বৰ্তমানৰ সেই সকলো অক্লান্ত কৰ্মী দেৱেন্দ্ৰনাথ আচাৰ্যলৈ বিনম্ৰ শ্ৰদ্ধাঞ্জলি জ্ঞাপন কৰে। বৰ্তমানৰ উদ্ভাৱনীমূলক পৰিৱেশৰ প্ৰতি লক্ষ্য ৰাখি এজিচিএলক জীৱাশ্ম ইন্ধনৰ পৰা উৎপাদিত শক্তি ব্যৱহাৰৰ পৰিৱৰ্তে বৈদ্যুতিক শক্তি ব্যৱহাৰৰ দিশত গুৰুত্ব প্ৰদান কৰিবলৈ আহ্বান জনাই মুখ্যমন্ত্ৰীয়ে। বৈদ্যুতিক বাহনৰ বৰ্ধিত চাহিদাৰ প্ৰতি লক্ষ্য ৰাখি এজিচিএলে ৰাজ্যখনত চাৰ্জিং ষ্টেচন স্থাপনৰ ব্যৱসায় ক্ষেত্ৰত প্ৰৱেশ কৰাটো প্ৰয়োজনীয় বুলি কয় মুখ্যমন্ত্ৰীগৰাকীয়ে। গেছ গ্ৰিড নেটৱৰ্ক শক্তিশালীকৰণৰ দ্বাৰা ক্ষমতা বৃদ্ধি কৰি প্ৰয়োজনত চুবুৰীয়া ৰাজ্য আৰু দেশসমূহলৈ গেছ পৰিবহণ কৰাৰ দিশতো কোম্পানীটোৱে মনোনিৱেশ কৰাৰ পোষকতা কৰে৷