গুৱাহাটীঃ ৰাজ্য চৰকাৰে ৰাজ্যৰ ৱেব পৰ্টেল আৰু ছ’চিয়েল মিডিয়া প্লেটফৰ্মত কাঢ়া নজৰ দিব৷ একাংশ ৱেব পৰ্টেল আৰু ছ’চিয়েল মিডিয়া ব্যৱহাৰকাৰীয়ে ফেক নিউজ প্ৰচাৰ কৰি সামাজিক পৰিবেশ বিঘ্নিত কৰাৰ অভিযোগ উত্থাপন হৈ থকাৰ সময়তে ৰাজ্য প্ৰশাসনে বেৱ পৰ্টেল আৰু ছ’চিয়েল মিডিয়া ব্যৱহাৰকাৰীৰ বিৰুদ্ধে ব্যৱস্থা গ্ৰহণৰ দিশে আগবাঢ়িছে৷

ৰাজ্যৰ মুখ্য সচিব কুমাৰ সঞ্জয় কৃষ্ণই ভুৱা বাতৰিত সম্পচাৰ কৰা ৰাজ্যৰ ৱেব পৰ্টেল আৰু ছ’চিয়েল মিডিয়া ব্যৱহাৰকাৰীৰ বিৰুদ্ধে ব্যৱস্থা গ্ৰহণৰ বাবে শুকুৰবাৰে এখন বিশেষ বৈঠক অনুষ্ঠিত কৰে৷ জনসংযোগ বিভাগৰ আয়ুক্ত সচিব প্ৰীতম শইকীয়া, সঞ্চালক অনুপম চৌধুৰীৰ সৈতে বৈঠক অনুষ্ঠিত কৰি মুখ্য সচিব কৃষ্ণই ভুৱা বাতৰি আৰু ভুৱা পোষ্ট কৰা লোকৰ বিৰুদ্ধে তাৎক্ষণিক ব্যৱস্থা লোৱাৰ নিৰ্দেশ দিয়ে।

মুখ্য সচিবৰ কাৰ্যালয়ত অনুষ্ঠিত বৈঠকত ৱেব প’ৰ্টেল আৰু ছ’চিয়েল মিডিয়া ব্যৱহাৰকাৰীয়ে ভুল তথ্যৰে বাতৰি প্ৰচাৰ কৰি সমাজৰ ক্ষতি কৰা বুলি কৈ
এই কথা চৰকাৰৰ দৃষ্টিত পৰা বুলি কয়৷ ৱেব পৰ্টেলসমূহে ভুৱা, অশুদ্ধ আৰু মনে সজা বাতৰি প্ৰচাৰত কৰাত সাধাৰণ ৰাইজ বিপথে পৰিচালিত হোৱা বুলিও কয় জনসংযোগৰ এক বিবৃতিত৷