ডিজিটেল ডেস্কঃ দিল্লী আৰু পঞ্জাৱৰ শাসকীয় দল আম আদমী পাৰ্টীয়ে ২০২২ চনৰ ৰাষ্ট্ৰপতি নিৰ্বাচনত কোনগৰাকী প্ৰাৰ্থীক ভোটদান কৰিব এইলৈ শেহতীয়াকৈ সিদ্ধান্ত লৈছে৷ শনিবাৰে মুখ্যমন্ত্ৰী অৰবিন্দ কেজৰিৱালৰ ঘৰত আম আদমী পাৰ্টিৰ ৰাজনৈতিক পৰিক্ৰমা সমিতিৰে (পিএচি) এখন বৈঠক অনুষ্ঠিত হয়। এই বৈঠকত ৰাষ্ট্ৰপতি নিৰ্বাচনৰ বিষয়ে আলোচনা কৰা হৈছিল। ৰাষ্ট্ৰপতি নিৰ্বাচনত ভোটদানৰ বিষয়ে সিদ্ধান্ত লোৱাৰ পিছত, ঘোষণা কৰা হৈছে যে দলটোৱে সামূহিক বিৰোধী দলৰ প্ৰাৰ্থী যশৱন্ত সিনহাক সমৰ্থন কৰিব।

ৰাজনৈতিক পৰিক্ৰমা সমিতিৰ বৈঠকত অৰবিন্দ কেজৰিৱাল, মনীষ চিছোদিয়া, পংকজ গুপ্তা, ৰাঘৱ চাড্ডা, আতিশী, সঞ্জয় সিং, দুৰ্গেশ পাঠক, ৰাখী বিদলান, এন ডি গুপ্তা উপস্থিত আছিল। দুখন ৰাজ্যৰ (দিল্লী আৰু পঞ্জাৱ) চৰকাৰৰ সৈতে আপ হৈছে একমাত্ৰ অ-বিজেপি, অ-কংগ্ৰেছী দল।
আম আদমী পাৰ্টিৰ এই দুখন ৰাজ্যৰ পৰা ৰাজ্যসভাৰ ১০ জন সাংসদ আছে, যাৰ ভিতৰত আছে দিল্লীৰ তিনিজন আৰু পঞ্জাৱৰ সাতজন। দলটোৰ পঞ্জাৱত ৯২ জন, দিল্লীত ৬২ জন আৰু গোৱাত দুজন বিধায়ক আছে। ৰাষ্ট্ৰপতি নিৰ্বাচনৰ বাবে ভোটদান সোমবাৰে অনুষ্ঠিত হ’ব।