গুৱাহাটীঃ ক’ৰোনা মহামাৰীৰ পৰা মানৱজাতিক ৰক্ষা কৰাৰ ঢাল হৈছে চিকিৎসকসকল৷ মানৱ জাতিৰ এই বিপদৰ সময়ত মানৱ জাতিক সহায় কৰিবৰ বাবে যুদ্ধ ঘোষণা কৰা চিকিৎসকো ক’ৰোনা সংক্ৰমণৰ পৰা ৰক্ষা পোৱা নাই৷ আমাৰ ৰাজ্যত ইতিমধ্য কেইবাগৰাকী চিকিৎসক ক’ৰোনাত আক্ৰান্ত হোৱাৰ সময়তে সোমবাৰে পুনৰ গুৱাহাটী মহানগৰীৰ এগৰাকী চিকিৎসক ক’ৰোনাত আক্ৰান্ত হোৱাৰ খবৰ পোৱা গৈছে৷

জানিব পৰা মতে, মহানগৰীৰ আৰ্য হস্পিতালৰ চিকিৎসক ডা০ বুলেন ফুকন কোৱিড-১৯ত আক্ৰান্ত হৈছে বুলি জানিব পৰা গৈছে। মহেন্দ্ৰ মোহন চৌধুৰী হস্পিতালত চিকিৎসাধীন হৈ থকা চিকিৎসকগৰাকী কেইবাদিন ধৰি জ্বৰত আক্ৰান্ত হৈ আছিল৷

এগৰাকী ক’ৰোনা আক্ৰান্ত ৰোগীৰ সংস্পৰ্শত অহাৰ ফলত ক’ৰোনা ভাইৰাছ সংক্ৰমিত হোৱাৰ সন্দেহ কৰা হৈছে৷ চিকিৎসকগৰাকীয়ে ক’ৰোনা ৰোগীৰ স্বাৱ টেষ্ট কৰাৰ সময়ত পিপিই কিট পৰিধান কৰা নাছিল। ক’ৰোনা ধৰা পিছত চিকিৎকগৰাকীক চিকিৎসা কৰা হয় আৰু বৰ্তমান সুস্থ বুলি জানিব পৰা গৈছে৷ চিকিৎসকগৰাকীয়ে বসবাস কৰা খ্ৰীষ্টানবস্তিৰ অমৰাবতী পেলেছ নামৰ এপাৰ্টমেণ্ট কামৰূপ মহানগৰ প্ৰশাসনে কনটেইনমেণ্ট জ’ন ঘোষণা কৰিছে৷