টীয়কঃ যোৱা ২৩ ফেব্ৰুৱাৰীত ভয়াবহ পথ দুৰ্ঘটনাত পতিত হৈ অকাল মৃত্যুক আঁকোৱালি লোৱা টীয়ক চন্দ্ৰকমল বেজবৰুৱা মহাবিদ্যালয়ৰ প্ৰবক্তা ড০ ৰঞ্জিত ৰঞ্জন শইকীয়াৰ স্মৃতি জীয়াই ৰখাৰ উদ্দেশ্যে পৰিয়ালৰ সহযোগত এটি শৈক্ষিক ন্যাস গঠন কৰা হৈছে। যুৱ-প্ৰজন্মৰ মাজত ৰঞ্জিত ৰঞ্জন শইকীয়াৰ স্মৃতি জীয়াই ৰাখিবলৈ গঠন কৰা জীয়াই ৰখাৰ মানসেৰে গঠন কৰা ন্যাসে টীয়কৰ ফুড ভিল্লাত এখন সংবাদ মেল অনুষ্ঠিত কৰে কৰে।

সংবাদ মেলত ন্যাসৰ উপদেষ্টা অসম চৰকাৰৰ অৱসৰপ্ৰাপ্ত যুটীয়া সচিব হীৰা প্ৰসাদ নাথ, যোৰহাট জিলা ছাত্ৰ সন্থাৰ সম্পাদক জিতু নেওগ, টীয়ক আঞ্চলিক ছাত্ৰ সন্থাৰ সভাপতি ৰন্টু ভুঞা, প্ৰয়াত শইকীয়াৰ পৰিবাৰ ড০ ৰুবী নাথ, টীয়কৰ বিশিষ্ট যুৱ ব্যৱসায়ী বিক্ৰমজিৎ ভুঞা উপস্থিত থাকি প্ৰতি বছৰে টীয়ক অঞ্চলৰ পৰা উচ্চতৰ মাধ্যমিক চূড়ান্ত পৰীক্ষাত সুখ্যাতিৰে উত্তীৰ্ণ বিশেষকৈ দৰিদ্ৰ পৰিয়ালৰ একোগৰাকী ছাত্ৰ অথবা ছাত্ৰীক প্ৰত্যেক বৰ্ষতে স্নাতক পৰ্যায়ত শিক্ষাগ্ৰহণৰ ক্ষেত্ৰত সম্পূৰ্ণ খৰছ বহন কৰিব বুলি সংবাদমেলত ব্যক্ত কৰে।

উল্লেখ্য যে চলিত বৰ্ষৰ পৰাই ন্যাসে এই সুবিধাসমূহ ছাত্ৰ-ছাত্ৰীৰ উদ্দেশ্যে মুকলি কৰা বুলি জানিবলৈ দিয়ে। এই বিষয়ত অধিক জানিবৰ বাবে টীয়ক চন্দ্ৰ কমল বেজবৰুৱা মহাবিদ্যালয়ৰ অৰ্থনীতি বিভাগৰ প্ৰবক্তা তথা ড০ ৰঞ্জিত ৰঞ্জন শইকীয়াৰ সহধৰ্মিনী ৰুবী নাথৰ সৈতে যোগাযোগ কৰিবলৈ আহ্বান জনাই ন্যাসে।