ৰঙিয়াঃ কামৰূপ গ্ৰাম্য জিলা প্ৰশাসনৰ উদ্যোগত আয়োজিত ৫৯ সংখ্যক শিক্ষক দিৱসৰ লগত সংগতি ৰাখি ৰঙিয়াৰ বৈদ্যগড় হাইস্কুলৰ অৱসৰপ্ৰাপ্ত শিক্ষক দ্বিগেন কলিতালৈ জিলা কৃতী শিক্ষকৰ বঁটা আগবঢ়োৱা হয়। শনিবাৰে কামৰূপ জিলা প্ৰশাসন আৰু শিক্ষা বিভাগৰ যৌথ উদ্যোগত আমিনগাওস্থিত ৰাষ্ট্ৰীয় আইন মহাবিদ্যালয়ৰ প্ৰেক্ষাগৃহত অনুষ্ঠিত গাম্ভীৰ্যপূৰ্ণ অনুষ্ঠানত উক্ত বটা প্ৰদান কৰা হয়।

মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ উপাচাৰ্য ডঃ হিতেশ ডেকাৰ লগতে আই আই টি গুৱাহাটীৰ অধ্যাপক ডঃ কেয়ুৰ চোৰাথিয়া, জিলা উপায়ুক্ত কৈলাশ কাৰ্তিক এনৰ লগতে বিদ্যালয় পৰিদৰ্শক মাধৱ চন্দ্ৰ ডেকাৰ উপস্থিতিত কলিতালৈ বঁটা আগবঢ়োৱা হয়।

উল্লেখ্য যে বিদ্যালয় প্ৰতিষ্ঠা কালৰে পৰা সুদীৰ্ঘ কাল বিনা বেতনৰে শিক্ষা বৃত্তিত জড়িত থাকি ২০১৩ চনত পদ প্ৰাদেশীকৰণ হোৱা কৃতী শিক্ষকগৰাকীয়ে চলিত বৰ্ষৰ ৩০জুনত অৱসৰ গ্ৰহণ কৰে। অসম আন্দোলনৰ এগৰাকী সক্ৰিয় কৰ্মী ৰূপে পৰিচিত দ্বিগেন কলিতাই কামৰূপ জিলা ভিত্তিত কৃতী শিক্ষকৰ বঁটা লাভ কৰাত উৎফুল্লিত হৈ পৰিছে ৰঙিয়াৰ বিদ্বৎ মহল।