মাৰ্ঘেৰিটাৰ পৰা ফাইজুৰ ৰহমানঃ উজনি অসমৰ সাংবাদিকসকলৰ অন্যতম সাংবাদিক মঞ্চ মাৰ্ঘেৰিটা সাংবাদিক সন্থাৰ দশম দ্বি-বার্ষিক অধিবেশনখনি অহা ৯ আৰু ১০ এপ্ৰিলত দুদিনীয়া কাৰ্যসূচীৰে মাৰ্ঘেৰিটা সঞ্জীৱনী কমপ্লেক্স দুদিনীয়া কাৰ্যসূচীয়ে অনুষ্ঠিত কৰিবৰ বাবে প্ৰস্তুতি চলি আছে৷ ১০ এপ্ৰিলৰ পুৱা ১০.৩০ বজাৰ পৰা অনুষ্ঠিত হ’বলগীয়া ‘সাংবাদিকতা আৰু সাম্প্রতিক সময়ৰ প্ৰত্যাহ্বান’ শীর্ষক গজেন বৰঠাকুৰ আৰু গকুল শৰ্মা স্মাৰক বক্তৃতানুষ্ঠান আৰু বঁটা প্রদান অনুষ্ঠানত যুৱ সাংবাদিক হেমন্ত কুমাৰ শইকীয়াক সলিল নেওগ সোঁৱৰণী প্ৰতিশ্ৰুতিসম্পন্ন যুৱ সাংবাদিকতা বঁটা প্ৰদান কৰা হ’ব৷ মাৰ্ঘেৰিটা সাংবাদিক সন্থাই আগবঢ়াইছে এই বঁটা৷ কাকপথাৰৰ স্থানীয় সংবাদদাতা ৰূপে সেৱা আগবঢ়াই আহি নিজ দক্ষতাৰে হেমন্ত কুমাৰ শইকীয়া তিনিচুকীয়া জিলা সাংবাদিক সন্থাৰ মুখপত্ৰ সম্পাদক হিচাপে কাৰ্যনিৰ্বাহ কৰি আছে। অনুষ্ঠান সঞ্চালনা কৰিব সন্থাৰ সভাপতি ৰামপ্রসাদ আম্বেদকাৰে। অসম বাৰ্তাজীৱী সংঘৰ দক্ষিণ-পূব মণ্ডলৰ সম্পাদক ৰাণাজ্যোতি নেওগে উদ্বোধন কৰিবলগীয়া বক্তৃতানুষ্ঠানত মুল বক্তাৰূপে অংশগ্রহণ কৰিব তিনিচুকীয়া জিলা সাংবাদিক সংস্থাৰ প্রাক্তন সভাপতি অমুল্য খাটনিয়াৰ আৰু মুখ্য অতিথিৰূপে উপস্থিত থাকিব তিনিচুকীয়া জিলা সাংবাদিক সন্থাৰ সভাপতি অনুজ কলিতা। বিশিষ্ট অতিথিৰূপে অংশগ্রহণ কৰিব তিনিচুকীয়া জিলা সাংবাদিক সন্থাৰ প্ৰাক্তন সভাপতি ক্রমে অর্জুন বৰুৱা, হিমেন ভট্টাচার্য আৰু ডা০ ঋষি দাসৰ লগতে মাৰ্ঘেৰিটাৰ বিশিষ্ট চিকিৎসক ডা০ সঞ্জীৱ সোণোৱাল। অধিৱেশনৰ লগত সংগতি ৰাখি প্ৰকাশ পাবলগা মুখপত্র ‘সীমান্ত’ উন্মোচন কৰিব জ্যেষ্ঠ সাংবাদিক তথা বিশিষ্ট সাহিত্যিক জগত চাংমা। অধিৱেশন উপলক্ষে প্রথম দিনা সন্থাৰ সভাপতি ৰামপ্রসাদ আম্বেদকাৰে সন্থাৰ পতাকা উত্তোলনেৰে কাৰ্যসূচী শুভাৰম্ভ কৰিব। পুৱা ১০:৩০ বজাত ‘আপোনাৰ কল্পনাৰ মাৰ্ঘেৰিটা নগৰ’ শীর্ষক মুকলি আলোচনা সভা অনুষ্ঠিত হ’ব। সন্ধিয়া মাৰ্ঘেৰিটা সাংবাদিক সংস্থাৰ সাধাৰণ সভা আৰু বিষয়বাছনি সভা অনুষ্ঠিত হ’ব।