নগাঁৱৰ পৰা জয়ন্ত মুদৈঃ ভাৰতবৰ্ষৰ ১৯ খন ৰাজ্যৰ দৰে অসমতো পুথিভঁৰাল আইন প্ৰণয়নৰ দাবী সদৌ অসম গ্ৰাম্য পুথিভঁড়াল সন্থাৰ। শনিবাৰে নগাঁৱত অনুষ্ঠিত হোৱা সদৌ অসম গ্ৰাম্য পুথিভঁৰাল সন্থাৰ ৰাজ্যিক পূৰ্ণাংগ অধিবেশনৰ পতাকা উত্তোলন কৰি সন্থাটোৰ সভাপতি প্ৰতাপ হাজৰিকাই সংবাদ মাধ্যমৰ আগত কয় যে-অসমৰ আমোলাতন্ত্ৰই পুথিভঁৰাল আইন প্ৰণয়নৰ পোষকতা নকৰে । ইয়াৰ বিপৰীতে তেওঁলোক ইয়াক অনুৎপাদনশীল ব্যৱস্থা বুলিহে চৰকাৰক পতিয়ন নিয়াই আৰ্থিক বিনিয়োগ নকৰিবলৈ ৰঙা ফিটাৰ মেৰপেঁচৰ ৰাজনীতি আৰম্ভ কৰে । গাঁৱৰ উন্নয়নৰ জৰিয়তেহে ৰাজ্যৰ সামগ্ৰিক উন্নয়ন সম্ভৱ। উল্লেখ্য যে, ১৯৮৫ চনৰ ২৭ জানুৱাৰীত নগাঁৱত জন্মলাভ কৰা সদৌ অসম গ্ৰাম্য পুথিভঁৰাল সন্থাৰ ৩৭ সংখ্যক পূৰ্ণাংগ অধিবেশনখনিৰ কাৰ্যসূচীৰ অশৰূপে শনিবাৰে পতাকা উত্তোলন, স্মৃতি তৰ্পণ, আলোচনা চক্ৰ, কবি সন্মিলন আৰু সাংস্কৃতিক অনুষ্ঠান অনুষ্ঠিত হয়। দেওবাৰে সাংস্কৃতিক শোভাযাত্ৰা আৰু মুকলি সভাৰে সদৌ অসম গ্ৰাম্য পুথিভঁৰাল সন্থাৰ ৰাজ্যিক পূৰ্ণাংগ অধিবেশনৰ সামৰণি পৰিব।