গুৱাহাটীঃ বৰাক উপত্যকাৰ তিনি জিলা ক্ৰমে কাছাৰ, কৰিমগঞ্জ আৰু হাইলাকান্দিত বৃদ্ধি পোৱা কোৰোনা ভাইৰাছৰ সংক্ৰমণৰ প্ৰতি লক্ষ্য ৰাখি অহা ২৬ আগষ্টৰ পৰা জিলা কেইখনত ১০ দিনৰ বাবে সম্পূৰ্ণ লকডাউন ঘোষণা কৰা হৈছে। ৰাজ্যৰ মুখ্য সচিব কুমাৰ সঞ্জয় কৃষ্ণই দেওবাৰে জাৰি কৰা এক নিৰ্দেশ অনুসৰি অহা ২৬ আগষ্টৰ পৰা ৫ ছেপ্তেম্বৰলৈ জিলা তিনিখনত লকডাউন অব্যাহত থাকিব।

এই সন্দৰ্ভত মুখ্য সচিবগৰাকীয়ে কয় যে জিলা কেইখনৰ উপায়ুক্তই দাখিল কৰা কোভিড সংক্ৰমণৰ প্ৰতিবেদনলৈ লক্ষ্য ৰাখি আৰু আলোচনামৰ্মে ৰাজ্য চৰকাৰে এই লকডাউন জাৰি কৰাৰ সিদ্ধান্ত লৈছে, যাতে কোভিড-১৯ৰ সংক্ৰমণ ৰোধ কৰিব পৰা যায়। উল্লেখ্য যে, কাছাৰ, হাইলাকান্দি আৰু কৰিমগঞ্জ জিলাত বৰ্তমানলৈকে ৩৫০০ৰো অধিক লোক কোভিড-১৯ত আক্ৰান্ত হোৱাৰ উপৰিও প্ৰায় ৩০ জন লোকৰ ইতিমধ্যে মৃত্যু ঘটিছে।

আনহাতে ৰাজ্যৰ স্বাস্থ্য বিভাগে সদৰী কৰা তথ্য অনুসৰি, বৰ্তমানলৈকে ৰাজ্যত কোভিড-১৯ৰ আক্ৰান্তৰ সংখ্যাই ৯০ হাজাৰৰ ঘৰ অতিক্ৰমণ কৰিছে। ৰাজ্যত ২৪২ জন লোকৰ কোভিড আক্ৰান্ত হৈ মৃত্যু ঘটিছে। অৱশ্যে দেওবাৰ পৰ্যন্ত ৰাজ্যত ৭০,৯০০ জন লোক কোভিড-১৯ৰ পৰা সুস্থ হৈ ঘৰলৈ উভতিবলৈ সক্ষম হৈছে বুলিও স্বাস্থ্য বিভাগৰ তথ্যত প্ৰকাশ।