বোকাজানঃ ক’ৰোনা মহামাৰীয়ে সৃষ্টি কৰা সংক্ৰমণৰ আতংকৰ সময়ত লক-ডাউনৰ ফলত সাধাৰণ নাগৰিক ঘৰতে আৱদ্ধ হৈ পৰিছে৷ কিন্তু তেনে সময়তে কাৰ্বি আংলং জিলাৰ বকলীয়াঘাটৰ এগৰাকী অৱসৰপ্ৰাপ্ত অধ্যক্ষই সমাজসেৱাৰ সুন্দৰ নিদৰ্শন দাঙি ধৰিছে৷ সমাজপ্ৰিয় নিঃস্বাৰ্থ সমাজসেৱক বকলীয়াঘাট উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ অতুল চন্দ্ৰ শইকীয়াই সময়ে সময়ে সমাজৰ হিতৰ বাবে কাম কৰি আহিছে৷ অৱসৰপ্ৰাপ্ত অধ্যক্ষ অতুল চন্দ্ৰ শইকীয়াই লক-ডাউনৰ সময়ত ঘৰতে থাকি

শ্ৰীমন্ত শংকৰদেৱ সংঘৰ বকলীয়াঘাট আঞ্চলিক শাখাৰ নামঘৰ চৌহদত সম্পূৰ্ণ ব্যক্তিগত প্ৰচেষ্টাৰে এটা পকী পথ নিৰ্মাণ কৰে৷ পথটো দেওবাৰে উদ্ধোধন কৰা হয়। ইতিমধ্যে সোণালী জয়ন্তী বৰ্ষ অতিক্রম কৰা বকলীয়াঘাট নগৰৰ মাজমজিয়াতে নামঘৰটোৰ উন্নয়নৰ লগতে ইয়াক এক পৰ্যটনস্থলী হিচাপে গঢ় দিয়াৰ বাবে যোৱা কিছু বছৰ ধৰি যৎপৰনাস্তি চেষ্টা চলাই অহা শিক্ষকগৰাকীয়ে লক-ডাউনৰ সময়ছোৱাৰ ভিতৰতে শ্ৰীমন্ত শংকৰদেৱ সংঘৰ বকলীয়াঘাট আঞ্চলিক শাখাৰ নামঘৰৰ চৌহদৰ চাৰিওদিশে প্ৰায় ডেৰ লক্ষাধিক টকা ব্যয় কৰি এটা পদপথ নিৰ্মাণ কৰে।

দেওবাৰে পথটো ৰাইজৰ ব্যৱহাৰৰ বাবে মুকলি কৰি দিয়া হয়। পথটো ৰাইজৰ বাবে মুকলি কৰি দি প্ৰদান কৰা ভাষণত অধ্যক্ষগৰাকীয়ে পৰৱৰ্তী পৰ্যায়ত আঞ্চলিক নামঘৰৰ চৌহদটো পৰ্যটকৰ আকৰ্ষণৰ কেন্দ্ৰ হিচাপে গঢ়ি তোলাৰ বাবে পৰিকল্পনা হাতত লোৱাৰ কথা ব্যক্ত কৰে। পৰৱৰ্তী পৰ্যায়ত নামঘৰ চৌহদৰ ভিতৰতে সৌন্দৰ্যবৰ্ধনৰ বাবে এখন স্থায়ী দলং নিৰ্মাণৰ পৰিকল্পনাৰ বিষয়েও ভাষণ প্ৰসংগত উল্লেখ কৰে।

উল্লখ্যে যে, চৰকাৰী দায়িত্বৰ পৰা অৱসৰ গ্ৰহণ কৰাৰ পিছত বিগত প্ৰায় ১২ বছৰ ধৰি নামঘৰ চৌহদতে থকা শ্ৰীমন্ত শংকৰদেৱ বিদ্যালয়ৰ অধ্যক্ষৰ গুৰুদায়িত্ব পালন কৰি সমাজৰ প্ৰতি সেৱাৰ মনোভাৱ আগবঢ়াই আহিছে অতুল চন্দ্ৰ শইকীয়াই। চাকৰিৰ পৰা অৱসৰ গ্ৰহণৰ পিছৰে পৰা সমাজৰ হিতৰ বাবে নিৰৱচ্ছিন্নভাবে কাম কৰি অহা অৱসৰপ্ৰাপ্ত অধ্যক্ষগৰাকীয়ে ইতিপূৰ্বে বিদ্যালয়খনৰ উন্নয়ন বাবে ব্যক্তিগতভাবেও কেইবালক্ষ টকা ব্যয় কৰা বুলি জানিব পৰা গৈছে।

অধ্যক্ষগৰাকীৰ তৎপৰতাতে বিগত সময়ছোৱাত নামঘৰ চৌহদত কল, শাক-পাচলি, বিভিন্ন জাতৰ ফুল আদিৰ জৰিয়তে এক সুকীয়া ৰূপ প্ৰদান কৰিবলৈ সক্ষম হোৱা নামঘৰ চৌহদত বিভিন্ন ফলমূল, ফুল, শাক-পাচলি আদিৰ উৎপাদনৰ ব্যৱস্থা কৰাৰ পৰিকল্পনাৰ কথাৰ লগতে নামঘৰ চৌহদত সৌৰশক্তি চালিত প্ৰযুক্তিৰে কৃত্ৰিম পোহৰৰ ব্যৱস্থাৰে চৌহদটোক জিলাখনৰ ভিতৰতে এক অন্যতম গুৰুত্বপূৰ্ণ তথা আকৰ্ষণীয় স্থান হিচাপে গঢ়ি তোলাৰ সম্ভাৱনীয়তাৰ কথাও অধ্যক্ষগৰাকীয়ে নিজ ভাষণত উপস্থিত ৰাইজক অৱগত কৰে।