সৰুপথাৰঃ উজনিৰ সৰুপথাৰৰ বাট-পথৰ শোচনীয় অৱস্থা। ৰাইজে দীৰ্ঘদিন ধৰি বাট-পথ মেৰামতি কৰি উন্নত কৰাৰ দাবী জনাই আহিছে যদিও মন্ত্ৰী, বিধায়ক তথা গড়কাপ্তানি বিভাগে গুৰুত্ব প্ৰদান নকৰাৰ অভিযোগ উত্থাপন হৈ আহিছে৷ আনহে নালাগে যাতায়াতৰ অন্যতম সদাব্যস্ত সৰুপথাৰ-উৰিয়ামঘাট পথত যাতায়াতৰ পৰিবেশ নোহোৱা হৈ পৰিছে৷ সৰুপথাৰ-উৰিয়ামঘাট পথত মেৰামতিৰ অভাৱত বৃহৎ বৃহৎ গাত হোৱাৰ ফলত গাড়ী-মটৰটো দূৰৰ কথা খোজকাঢ়িবৰ পৰিবেশ নোহোৱা হৈছে৷ নিতৌ শ-শ ডাম্পাৰ, অ’এনজিচিৰ গাড়ীকে ধৰি সৰু-বৰ হাজাৰ হাজাৰ গাড়ী চলাচল কৰা পথটো গুৰুত্ব প্ৰদান নকৰাৰ অভিযোগ উঠিছে৷

দীৰ্ঘদিন ধৰি সৰুপথাৰৰ টেঙাহোলা গোঁহাই গাঁও আৰু গন্ধকৰৈ গাঁও হৈ উৰিয়ামঘাটলৈ যোৱা মুখ্য পথটো ইকৰাণী চাৰিআলিৰ অংশই বছৰ বছৰ ধৰি জৰাজীৰ্ণ হৈ আছে। পথটোৰ মাজত দ’ গাতৰ সৃষ্টি হৈছে। ৰাজপথৰ গাতত গাড়ীৰ চকা বহি যোৱাৰ ফলত গাড়ী লানি লাগি থাকিব লগা হয়৷ ফলত ব্যাপক যান-জোঁটৰ সৃষ্টি হৈ আহিছে৷ বুধবাৰে শীল ভৰ্তি এখন ডাম্পাৰ গাতত সোমাই যায়। ফলত সম্পূৰ্ণ শীল আনলোড কৰা পৰ্যন্ত গাড়ী সমূহে ৰৈ থাকিব লগা হয়। বৰষুণৰ বতৰত পথত খোজ কাঢ়িব নোৱাৰা পৰিবেশৰ বাবে ৰাইজে বিপদত পৰে।