সোমবাৰে বিজেপিত যোগ দিব কৃষক মুক্তিৰ এইসকল নেতা-সদস্য
- Update Time : Sunday, August 30, 2020
- 174 Time View
গুৱাহাটীঃ কৃষক মুক্তি সংগ্ৰাম সমিতিয়ে নিজাববীয়াকৈ ৰাজনৈতিক দল গঠন কৰিব বুলি ঘোষণা কৰাৰ সময়তে সংগঠনটোৰ কেবাজনো নেতা আৰু সদস্যই বিজেপিত যোগ দিবলৈ যো-জা চলোৱাৰ খবৰ পোৱা গৈছে। প্ৰাপ্ত খবৰ অনুযায়ী বিজেপিত যোগদানৰ বাবে কৃষক মুক্তি সংগ্ৰাম সমিতিৰ এসময়ৰ সাংগঠনিক সম্পাদক তথা সংগঠনটোৰ জ্যেষ্ঠ নেতা লিখন হাজৰিকাই লখিমপুৰৰ পৰা আন ১০জন কৃষক মুক্তিৰ সদস্যক লগত লৈ গুৱাহাটী অভিমুখে যাত্ৰা কৰিছে।
এইসকল কৃষক মুক্তিৰ সদস্যক বিজেপিলৈ অনাত এসময়ত সংগঠনটোৰ সৈতে জড়িত হিৰণ্য পাঠৰিৰ কিছু ভূমিকা থকা বুলি জানিব পৰা গৈছে। তেওঁলোকে বিজেপিৰ এজন শীৰ্ষ নেতাৰ ছত্ৰছায়াত দলটোত যোগ দিব। সোমবাৰে বিজেপিৰ ৰাজ্যিক কাৰ্যালয়ত অনুষ্ঠিত হ’ব এই যোগদানৰ কাৰ্যসূচী।
ইফালে, উক্ত কাৰ্যসূচীত গুৱাহাটী মহানগৰৰো কেইবাগৰাকী কৃষক মুক্তিৰ কৰ্মকৰ্তাই বিজেপিত যোগদান কৰিব বুলি চৰ্চা চলিছে। এনেদৰে কৃষক মুক্তিৰ নেতা আৰু বহু সদস্যই বিজেপিলৈ ঢাপলি মেলা বিষয়টোৱে ৰাজ্যৰ ৰাজনীতিক কোন দিশে লৈ যায় তাৰ প্ৰতি লক্ষ্য ৰাখিছে ভূ-ৰখা মহলে।
