গুৱাহাটীঃ একগ্ৰতা, ইচ্ছা শক্তি থাকিলে সফলতাৰ সকলো সীমা অতিক্ৰম কৰিব পাৰি। আৰ্থিক অৱস্থা, শাৰীৰিক অক্ষমতা সফলতাৰ হেঙাৰ হ’ব নোৱাৰে। একগ্ৰতা, ইচ্ছা শক্তিয়ে মানুহক সফল কৰে। এই কথাকেই প্ৰামাণ কৰিছে কামৰূপৰ চাংসাৰীৰ ধোপাতাৰি গাঁৱৰ আব্দুল মজিদ আলীয়ে। এইবেলি আব্দুল মজিদ আলীয়ে হাইস্কুল শিক্ষান্ত পৰীক্ষাত বহিছিল। শনিবাৰে ঘোষণা কৰা ফলাফল অনুসৰি ৫১৩ নম্বৰ লাভ কৰি সুখ্যাতিৰে উত্তীৰ্ণ হয় আব্দুল। ৮৬ শতাংশ নম্বৰ লাভ কৰি সুখ্যাতিৰে উত্তীৰ্ণ হয়।

দৰিদ্ৰ দিব্যাংগ ছাত্ৰ আব্দুল মজিদ আলীৰ দুয়োখন হাত কিলাকুটিৰ তলৰ অংশ নাই। কিলাকুটিৰ ওপৰৰ অংশটো স্বাভাৱিক নহয়। আব্দুল মজিদ আলীয়ে হাতৰ দুয়ো অৰ্ধ অংশ লগ লগাই লেখা মেলা কৰে। লিখি-মেলা কৰাত যথেষ্ট কষ্ট কৰিব লগা হয়।

চাংসাৰিৰ ধোপাতাৰি শিল ভৰাল হাইস্কুলৰ ছাত্ৰ আব্দুল মজিদ আলী। সংগ্ৰামত পিছ হুহুকি নহা প্ৰতিযোগিতামূলক জীৱনৰ প্ৰথম জখলাত সফল হয় আব্দুল মজিদ আলী। হাইস্কুল শিক্ষান্ত পৰীক্ষাত কৃতিত্ব অৰ্জন কৰাৰ পিছতে উচ্চ শিক্ষা গ্ৰহণ কৰি এজন চিকিৎসক হ’ব খোজে। অতি দৰিদ্ৰ পৰিয়ালৰ সন্তান আব্দুল। পিতৃ শুকুৰ আলীয়ে দিন হাজিৰা কৰি পৰিয়াল পোহ-পাল দিয়ে। দৰিদ্ৰ পিতৃয়ে নিজ পুত্ৰৰ সফলতাত আনন্দিত হৈ পৰে।

শনিবাৰে হাইস্কুল শিক্ষান্ত পৰীক্ষাৰ ফলাফল ঘোষণা কৰাৰ পিছতে আব্দুলৰ ঘৰত বহু লোক উপস্থিত হয়। স্থানীয় বিধায়ক সত্যব্ৰত কলিতাই প্ৰতিনিধি প্ৰেৰণ কৰি ছাত্ৰজনক শুভেচ্ছা জ্ঞাপন কৰি সকলো প্ৰকাৰৰ সহায় কৰাৰ প্ৰতিশ্ৰুতি দিয়ে। স্থানীয় আছু, অসম সংগ্ৰামী যুৱ-মঞ্চই আব্দুলক অভিনন্দন যাচে।