১. আজি সুধাকণ্ঠ ডঃ ভূপেন হাজৰিকাৰ ৯৪ সংখ্যক জন্ম দিৱস। ১৯২৬ চনৰ আজিৰ দিনটোতে শদিয়াত জন্মগ্ৰহণ কৰিছিল যুগজয়ী শিল্পীগৰাকীয়ে। কৰ’না কালৰ মাজতে ৰাজ্যৰ ভিন্ন প্ৰান্তত জন্ম দিৱসত সুধাকণ্ঠক স্মৰণ।

২. ৰাজ্যত যোৱা ২৪ ঘণ্টাত ২৭৮৫জনৰ দেহত ধৰা পৰে ক’ভিড পজিটিভ। ইয়াৰ ফলত ভাইৰাছবিধত আক্ৰান্ত লোকৰ সংখ্যা ১২৮২৪৪জনলৈ বৃদ্ধি পাইছে। সুস্থ হোৱা লোকৰ সংখ্যা বৃদ্ধি পাইছে ৯৯০৭৩ জনলৈ। আনহাতে, চিকিৎসাধীন হৈ আছে ২৮৭৯৮জন ৰোগী। কৰ’নাত আক্ৰান্ত হৈ মৃত্যু হৈছে ৩৭০ জনৰ।

৩. ২০২১ৰ প্ৰথমভাগতে দেশবাসীয়ে লাভ কৰিব পাৰে এটা ভাল খবৰ। মহাকাশত আন এক সাফল্যৰ অধিকাৰী হোৱাৰ দিশে ভাৰত। কেন্দ্ৰীয় মন্ত্ৰী জিতেন্দ্ৰ সিঙে জনোৱা মতে, সকলো ঠিকে-ঠাকে থাকিলে, ২০২১ৰ প্ৰথমভাগতে ইছৰোৱে উৎক্ষেপন কৰিব চন্দ্ৰযান-৩।

৪. লাদাখৰ পৰিস্থিতি অতি গুৰুতৰ। এই পৰিস্থিতিৰ অৱসান ঘটাবলৈ দুয়ো দেশৰ মাজত গুৰুত্বপূৰ্ণ ৰাজনৈতিক আলোচনাৰ প্ৰয়োজন আছে। ইণ্ডিয়ান এক্সপ্ৰেছৰ সৈতে হোৱা এক সাক্ষাৎকাৰত এই মন্তব্য কৰিছে ভাৰতৰ বিদেশ মন্ত্ৰী এছ জয়শংকৰে।

৫. এনচিবিৰ জেৰাত ৰিয়া চক্ৰৱৰ্তীৰ আৱেগিক মন্তব্য। ‘মই যি কৰিছিলো সকলো কেৱল সুশান্তৰ ভালৰ বাবেই কৰিছিলো। মই বেলেগ একো কৰা নাছিলো।’-সোমবাৰে জেৰাকালত এইদৰে কোৱা বুলি সদৰী কৰিছে এনচিবিৰ এটি সূত্ৰই।

৬. ভাৰতীয় ষ্টেট বেংককে ধৰি কেন্দ্ৰীয় চৰকাৰৰ কেবাটাও প্ৰতিষ্ঠানে ৫০ উৰ্ধৰ কৰ্মচাৰীক স্বেচ্ছামূলক অৱসৰ প্ৰদান কৰিবলৈ লোৱা সিদ্ধান্তক লৈ অব্যাহত আছে প্ৰতিক্ৰিয়া। বিৰোধী কংগ্ৰেছ তথা আন দলসমূহৰ মন্তব্য, ‘চৰকাৰ দেউলীয়া হৈছে। মোদী চৰকাৰে দেশৰ অৰ্থনীতি নিঃশেষ কৰি পেলাইছে।’ বেংক কৰ্মচাৰী সংন্থায়ো বিৰোধিতা কৰিলে উক্ত সিদ্ধান্তৰ।

৭. লকডাউনৰ সময়ছোৱাত বিমানৰ টিকট বুকিং কৰাসকলে ঘূৰাই পাব টিকটৰ ধন। দেশৰ উচ্চতম ন্যায়ালয়ক এই কথা অৱগত কৰিছে DGCA-এ। ২৫ মাৰ্চৰ পৰা ৩ মে’ৰ ভিতৰত বিমানৰ টিকট বুকিং কৰাসকলক উভতাই দিয়া হব টিকটৰ ধন। ঘৰুৱা আৰু আন্তৰাষ্ট্ৰীয় সকলো বিমান টিকটৰ ধন ঘূৰাই দিয়াৰ কথাও সদৰি কৰিছে সংস্থাটোৱে।

৮. আন্তৰ্জাতিক পৰ্যায়ত বিতৰ্কৰ মাজতে ৰাছিয়াই সাধাৰণ জনতাৰ বাবে মুকলি কৰিলে কৰ’না ভেকচিন স্পুটনিক-ভি। ৰাজধানী মস্কোৰ মেয়ৰে জনোৱা মতে অতি কম দিনৰ ভিতৰতে মস্কোৰ সকলো বাসিন্দাকে প্ৰদান কৰা হ’ব এই ভেকচিন। ইয়াৰ পিছতে পৰ্যায়ক্ৰমে আনসকলেও লাভ কৰিব ভেকচিন স্পুটনিক-ভি।

৯. আইচিআইচিআই বেংকৰ প্ৰাক্তন চিইঅ’ চন্দা কোচাৰৰ স্বামী দীপক কোচাৰক গ্ৰেপ্তাৰ। বেংকটোৱে ভিডিঅ’কন গ্ৰুপৰ সৈতে কৰা এক ব্যৱসায়িক চুক্তিক লৈ গ্ৰেপ্তাৰ কৰা হৈছে দীপক কোচাৰক।

১০. অহা ১৪ ছেপ্টেম্বৰত ভাগ্য নিৰ্ণয় হ’ব অসমৰ দুটাকৈ বৃহৎ উদ্যোগ নগাঁও আৰু কাছাৰ কাগজ কলৰ৷ সেইদিনা NCLTত বিচাৰাধীন হৈ থকা কাগজ কলৰ শেষৰটো শুনানি সম্পন্ন হ’ব। শুনানিৰ অন্তত দেউলীয়া ঘোষণা কৰিলে কাগজ কল দুটা বন্ধ হৈ পৰাতো প্ৰায় নিশ্চিত।