গুৱাহাটীঃ ৰাজ্যৰ প্ৰধান আঞ্চলিক দল বুলি দাবী কৰা অসম গণ পৰিষদৰ বৃহস্পতিবাৰে বিশেষ অধিবেশন অনুষ্ঠিত হয়৷ এই বিশেষ এদিনীয়া অধিবেশনৰ বিৰুদ্ধে একাংশ নেতা-কৰ্মী নাৰাজ যদিও আন একাংশ নেতা-কৰ্মী সুখী হোৱা দেখা যায়৷ মূলত এই অধিবেশনত উপস্থিত নাছিল প্ৰতিষ্ঠাপক সভাপতি তথা প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত৷

প্ৰফুল্ল কুমাৰ মহন্তই অধিবেশনত উপস্থিত নথকাৰ লগতে এই অধিবেশন অসাংবিধানিক বুলি ক্ষোভ উজাৰে৷ এই অধিবেশনত বিনা প্ৰতিদ্বন্দ্বিতাৰে পুনৰ সভাপতি নিৰ্বাচিত হয় বৰ্তমানৰ চৰকাৰৰ মন্ত্ৰী অতুল বৰা৷ অতুল বৰা ২০১৪ চনৰ পৰা অগপৰ সভাপতি হৈ আছে৷ অতুল বৰা অসাংবিধানিক ভাৱে সভাপতি নিৰ্বাচিত হোৱা বুলি কয় প্ৰফুল্ল কুমাৰ মহন্তই৷ তাৰ মাজতে পুনৰ সভাপতি নিৰ্বাচিত হৈ অতুল বৰাই ছ’চিয়েল মিডিয়া যোগে আবেগিক পোষ্ট কৰি দলৰ নেতা-কৰ্মীক ধন্যবাদ যাচে৷ বৰাই গভীৰ আস্থা, বিশ্বাস আৰু যি গধুৰ দায়িত্ব প্ৰদান কৰিলে তাৰ বাবে নেতা-কৰ্মীক ধন্যবাদ জ্ঞাপন কৰি দলটোক নতুন সাজেৰে গঢ় দিবলৈ চেষ্টা কৰিম বুলি কয়৷

অতুল বৰাই ফেচবুক পোষ্ট যোগে কয় ‘‘সকলো স্তৰৰ কৰ্মীসকললৈ গভীৰ শ্ৰদ্ধা আৰু অভিনন্দন জনাইছো। আমাৰ ওপৰত যি গভীৰ আস্থা, বিশ্বাস আৰু যি আমাক গধুৰ দায়িত্ব প্ৰদান কৰিলে দলটোক আমি নতুন সাজেৰে গঢ় দিবলৈ চেষ্টা কৰিম। আগন্তুক নিৰ্বাচনত বৰ্তমানৰ ১৪খন আসন কেনেকৈ বৃদ্ধি কৰিব পাৰি সেইটো আমাৰ মূল লক্ষ্য হ’ব। নতুন সাজেৰে প্ৰগতিশীল জাতীয়তাবাদৰ মন্ত্ৰেৰে কামৰ জৰিয়তে আমি আগুৱাই যাম। ৰাজ্যখনত বিভিন্ন জাতি-জনগোষ্ঠীৰ লোক আছে। বিভিন্ন ধৰ্মাৱলম্বী লোক আছে। ভাৰতীয় সংবিধানে যাক ভাৰতীয় বুলি কৈছে, যি সকলে অসমৰ বায়ু পানীৰ লগত বিলীন হৈ গৈছে সেই সকল অসমত অসমীয়া, হিন্দুৱে হওঁক নাইবা মুছলমান হওঁক। সেই সকলোকে লৈ আমি কেনেকৈ আগবাঢ়ি যাব পাৰো, বৰাক-ব্ৰহ্মপুত্ৰ-পাহাৰ ভৈয়াম সকলোৰে মানুহক লৈ আমি কেনেকৈ আগবাঢ়ি যাব পাৰো তাৰেই চেষ্টা চলিব। আঞ্চলিক দলৰ প্ৰাসংগিকতা বহু গুণে বৃদ্ধি পাইছে। নতুন চিন্তা চৰ্চাৰে আমি আগবাঢ়ি যাম। ২০২১ নিৰ্বাচনক লক্ষ্য লৈ পুৰণাসকলৰ অভিজ্ঞতা আৰু নতুনসকলৰ উদ্যমক লৈ আমি আগবাঢ়ি যাম। মোৰ দৃঢ় বিশ্বাস দল শক্তিশালী হব। তীব্ৰ গতিৰে আমি ২০২১ৰ নিৰ্বাচনৰ বাবে আগবাঢ়ি যাম।’’