গুৱাহাটীঃ সম্প্ৰীতিৰ মিলনভূমি নামনি অসমৰ বৰপেটা জিলাৰ ঐতিহ্যমণ্ডিত গণককুছি সত্ৰৰ শ্ৰীৰাম আতাৰ পবিত্ৰ ভিঠিৰ গুৰু আসন জ্বলাই দিয়া কাৰ্যক তীব্ৰ নিন্দা কৰাৰ লগতে ভৰ্ৎসনা কৰিছে সদৌ অসম গৰিয়া-মৰিয়া-দেশী জাতীয় পৰিষদে৷ পবিত্ৰ সত্ৰখনৰ ঐতিহ্যক কুলুষিত কৰিব খোজাৰ চেষ্টা কৰা বুলি কয় সদৌ অসম গৰিয়া-মৰিয়া-দেশী জাতীয় পৰিষদে৷ সংগঠনটোৰ কেন্দ্ৰীয় সমিতিৰ সভাপতি শ্বাহ নাৱাজ হুছেইন, কাৰ্যকৰী সভাপতি নুৰুল হক আৰু সাধাৰণ সম্পাদক আকতাৰ হুছেইনে এই ঘটনাৰ উচিত তদন্ত কৰি ঘটনাৰ সৈতে জৰিত সকলো লোকক গ্ৰেপ্তাৰ কৰি প্ৰশাসনক কঠোৰ শাস্তি দিয়াৰ ব্যৱস্থা কৰাৰ দাবী জনায়৷

সংগঠনটোৱে কয় যে বাৰে বাৰে অসমীয়া সমাজখনৰ অস্তিত্ব, প্ৰভূত্ব তথা জাতীয় আবেগত আঘাত হানি থাকিলে ধৈৰ্যৰ বান্ধ খোল খাব৷ তেতিয়া মূলসূঁতিৰ অসমীয়া সমাজখনে পৰিস্থিতি ভয়াবহ কৰিবলৈ বাধ্য হ’ব৷ এই কাণ্ডই মূল সূঁতিৰ অসমীয়া সমাজখনক অন্তৰত আঘাত দিছে৷ অসমৰ ঐতিহ্য-সংস্কৃতি-পৰম্পৰা বিৰোধী এটা চক্ৰই অহৰহ অসমীয়াৰ অভিমানক ভেঙুচালি কৰি অহা কাৰ্যক আমি গৰিহণা দিছো৷ গুৰু আসন জ্বলাই দিয়াৰ সাহস কৰা ৰফিকুল নামৰ দুৰ্বৃত্তৰ কোনো বহিঃশক্তিৰ সৈতে সম্পৰ্ক থাকিব পাৰে বুলিও আমি আশংকা ব্যক্ত কৰি অসমীয়াৰ চিৰ শত্ৰুৰ দলে কোনো বহিঃশক্তিৰ বলত বলিয়ান নহলে অসমীয়া সমাজখনক প্ৰত্যাহ্বান জনাবলৈ সাহত ক’ত পালে বুলি কয় সংগঠনটোৱে৷

সংগঠনটোৱে সমগ্ৰ ঘটনা অতি চিন্তনীয় বুলি ক্ষোভ প্ৰকাশ কৰি আৰক্ষী-প্ৰশাসনে ইয়াত অন্তঃনিহিত হৈ থকা কথা পোহৰলৈ আনি ভৱিষ্যতৰ অসমখনক অধিক সুৰক্ষিত কৰাৰ লগতে অসমীয়া জাতিক সুৰক্ষিত কৰাত সহায় কৰক বুলি কয় আৰক্ষী-প্ৰশাসনক৷ আনহাতে অসমৰ সকলো ঐতিহ্যমণ্ডত সত্ৰ, নামঘৰ সুৰক্ষিত কৰি ৰখাৰ ব্যৱস্থা কৰাৰ দাবী জনায়৷ সংগঠনটোৱে কয় যে আমাৰ হাতত পৰা তথ্য মতে, ৰফিকুল নামৰ যুৱকজনে ইয়াৰ পূৰ্বেও কেওটকুছি সত্ৰৰ লক্ষ্মী মন্দিৰৰ দেৱী মূৰ্তিৰ ক্ষতিসাধন কৰিছিল৷ যুৱকজনক নাকী লগােৱাত বিফল হোৱাৰ ফলতেই পুনৰ এনে কাণ্ড সংঘটিত হ’ল বুলি আমি অনুভৱ কৰা বুলি কয়৷ অসমত বিভেদ আৰু বিদ্বেষৰ স্থান নাই৷ এইখন শংকৰ-আজানৰ দেশত শান্তি আৰু একতাৰ এনাজৰীডাল কটকটীয়া হৈ আছিল আৰু থাকিব৷ অসমীয়াৰ শত্ৰুৱে সমাজখনক থানবান কৰিব খুজিলেও থানবান কৰিব নোৱাৰিব বুলিও কয় সংগঠনটােৱে৷