অঞ্জন জ্যোতি নাথ, বৰপেটাৰোডঃ বিটিএডিত বসবাস কৰাৰ সংখ্যালঘুৰ জীৱন আৰু সম্পত্তিৰ সুৰক্ষাক লৈ পুনৰ প্ৰশ্ন উত্থাপন হৈছে৷ পুনৰ সংখ্যালঘুৰ জীৱন আৰু সম্পত্তিৰ সুৰক্ষাক লৈ প্ৰশ্ন উত্থাপন কৰি সুৰক্ষা নিশ্চিত কৰাৰ দাবীত প্ৰতিবাদ সাব্যস্ত কৰিছে সদৌ অসম সংখ্যালঘু ছাত্ৰ ইউনিয়ন চমুকৈ আমছুৱে৷ সদৌ অসম সংখ্যালঘু ছাত্ৰ ইউনিয়ন চমুকৈ আমছুৰ কেন্দ্ৰীয় সমিতিৰ নিৰ্দেশ মৰ্মে বৃহস্পতিবাৰে সমগ্ৰ বিটিএডিত প্ৰতিবাদ সাব্যস্ত কৰে আমছুৱে৷

আন জিলাকেইখনৰ লগতে বাক্সা জিলা আমছুৱে বাক্সা জিলা সমিতিৰ মুখ্য কাৰ্যালয়ৰ সন্মুখত মুখত ক’লা কাপোৰ বান্ধি বিটিএডি অঞ্চলত বসবাস কৰা সংখ্যালঘু জনসাধাৰণৰ জীৱন আৰু সম্পত্তিৰ নিৰাপত্তা সুনিশ্চিত কৰা, হত্যাৰ বলি হোৱা খাইৰুল ইছলাম, আমিনুৰ ৰহমান খান, ৰহিম বাদশ্বাহ আৰু জহুৰা খাতুনৰ হত্যাকাৰীক শীঘ্ৰে গ্ৰেপ্তাৰ কৰি দৃষ্টান্তমূলক শাস্তি দিয়াৰ ব্যৱস্থা কৰাৰ দাবী জনাই।

হত্যাল বলি হোৱা পৰিয়ালসমূহক ১০ লাখ টকাকৈ এক-কালীন আৰ্থিক সাহায্য প্ৰদান কৰা, বিটিএডিৰ পৰিষদীয় নিৰ্বাচনত সংখ্যালঘুবসতি প্ৰধান অঞ্চলসমূহত অৰ্ধ-সামৰিক বাহিনী মোতায়েন কৰি নিৰাপত্তা ব্যৱস্থা সুনিশ্চিত কৰাৰ দাবীত দুঘণ্টীয়া অৱস্থান ধৰ্মঘট কাৰ্যসূচী ৰূপায়ন কৰে আমছুৱে। প্ৰতিবাদকাৰীসকলে হাতে হাতে প্লে-কাৰ্ড লৈ আমছু জিন্দাবাদ, অসম চৰকাৰ মুৰ্দাবাদ, বিটিএডি প্ৰশাসন হায়ঃ হায়ঃ, হত্যা-হিংসা বন্ধ কৰক, বিটিএডিত থকা অবৈধ অস্ত্ৰ জব্দ কৰক, অপৰাধীক কঠোৰ হাতেৰে দমন কৰক, সংখ্যালঘুৰ জীৱন আৰু সম্পত্তিৰ নিৰাপত্তা সুনিশ্চিত কৰক, মৃতকৰ পৰিয়ালসমূহক ১০ লাখ টকাৰ আৰ্থিক সাহায্য প্ৰদান কৰক আদি শ্ল’গানেৰে পৰিবেশ উত্তাল কৰি তোলে।

কাৰ্যসূচীত উপস্থিত থাকে আমছুৰ কেন্দ্ৰীয় সমিতিৰ কাৰ্যকৰী সদস্য আব্দুল ৰহিম, জিলা সমিতিৰ সভাপতি ছাইফুল ইছলাম খান, কাৰ্যকৰী সভাপতি গিয়াছ উদ্দিন, সাধাৰণ সম্পাদক শ্বাহাদত হুছেইন, জিলা সমিতিৰ প্ৰাক্তন উপ-সভাপতি আলাল উদ্দিনৰ লগতে জিলা আৰু আঞ্চলিক সমিতিৰ কৰ্মকৰ্তাসকল।