গুৱাহাটীঃ সাহিত্যিক, বিশিষ্ট শিক্ষাবিদ ড০ হিতেশ ডেকা হ’ব মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ নতুন উপাচাৰ্য৷ বৰ্তমানৰ উপাচাৰ্য ড০ কন্দৰ্প কুমাৰ ডেকাৰ কাৰ্যকাল অহা ৯ জুনত অন্ত পৰিব। শ্ৰীমন্ত শংকৰদেৱ সংঘৰ প্ৰধান সম্পাদক বাবুল বৰাই জানিবলৈ দিয়া মতে, অহা ১০ জুনত বিশ্ববিদ্যালয়ৰ সপ্তম প্ৰতিষ্ঠা দিৱসত নৱ নিযুক্ত উপাচাৰ্যগৰাকীয়ে দায়িত্বভাৰ গ্ৰহণ কৰিব৷ কৃষ্ণকান্ত সন্দিকৈ ৰাজ্যিক মুক্তি বিশ্ববিদ্যালয়ৰ উপাচাৰ্যৰূপে নিয়োজিত হৈ থকা বিশিষ্ট শিক্ষাবিদগৰাকীয়ে বিশ্ববিদ্যালয়খনত সঠিক দিশত আগুৱাই নিবৰ ব্যৱস্থা গ্ৰহণ কৰিব বুলি আমাক জানিবলৈ দিয়ে৷

সাহিত্যিক, বিশিষ্ট শিক্ষাবিদ ড০ হিতেশ ডেকাই স্কাই নিউজৰ প্ৰতিনিধিৰ সৈতে হোৱা টেলিফোনিক বাৰ্তালাপত শ্ৰীমন্ত শংকৰদেৱ বিশ্ববিদ্যালয়ৰ দ্বিতীয়গৰাকী উপাচাৰ্য হিচাপে দায়িত্ব গ্ৰহণ কৰিবলৈ পায় মই গৌৰৱ অনুভৱ কৰিছো বুলি কয়৷ অসমৰ জাতীয় জীৱনৰ লগত জড়িত ওতঃপ্ৰোতভাৱে ভাৱে জড়িত শ্ৰীমন্ত শংকৰদেৱ সংঘৰ প্ৰচেষ্টাত গঢ় লৈ উঠা শংকৰদেৱ বিশ্ববিদ্যালয়ক বিশ্বমুখী কৰিবৰ বাবে অপ্ৰাণ চেষ্টা চলোৱা হ’ব৷ বিশ্ববিদ্যালখনৰ নতুন উপচাৰ্য ড০ হিতেশ ডেকাই স্কাই নিউজৰ প্ৰতিনিধিক আৰু কয় যে শ্ৰীমন্ত শংকৰদেৱৰ আদৰ্শ আৰু সৃষ্টিৰাজি প্ৰচাৰ আৰু প্ৰসাৰৰ বাবে বিশ্ববিদ্যালয় খনে কাম কৰি যাব৷ শ্ৰীমন্ত শকংৰদেৱ সংঘ ভাৰতবৰ্ষৰ ভিতৰতে সু-শৃংখলাবদ্ধ আৰু নীতি আদৰ্শত থকা বৃহৎ সংগঠন বুলি উল্লেখ কৰি ডেকাই কয় বিশ্ববিদ্যালখনে বিদ্যায়তনিক বিষয়ৰ লগতে অসমৰ জাতীয় জীৱনৰ সমৃদ্ধিৰ বাবে কাম কৰি যাব৷