বটদ্ৰৱাঃ শিল্পীৰ জন্ম হয় অনুৰাগীৰ হৃদয়ৰ পৰা। যদি অনুৰাগী নাথাকে, তেন্তে শিল্পীৰ অস্তিত্বও শূণ্য। এই অনুৰাগী সকলেই শিল্পী নামৰ এটা সত্বাক জীয়াই ৰাখে। তেওঁলোকৰ বাবে কেতিয়াবা জীৱন দিবলৈও প্ৰস্তুত হয় অনুৰাগীসকল। বিভিন্ন ধৰণে তেওঁলোকে তেওঁলোকৰ প্ৰিয় শিল্পীজনৰ প্ৰতি থকা শ্ৰদ্ধা, সন্মান, ভালপোৱাখিনিৰ প্ৰতিফলন ঘটায়। অনুৰাগী যদি প্ৰতিভাৱান হয়, তেন্তে শিল্পীক তেওঁলোকে তুলি ধৰে কেতিয়াবা কবিতা, কেতিয়াবা গান বা কেতিয়াবা ছবিৰ মাজেৰেও।

অসমৰ জনপ্ৰিয় সংগীতশিল্পী তথা যুৱ প্ৰজন্মৰ হাৰ্টথ্ৰৱ জুবিন গাৰ্গৰ তেনে এগৰাকী অনুৰাগীয়েই হৈছে বটদ্ৰৱাৰ মৃদুপৱন বৰা। অনন্য প্ৰতিভাৰ অধিকাৰী মৃদুপৱনে তেওঁৰ প্ৰিয় শিল্পীজনৰ প্ৰতি থকা অগাধ ভালপোৱা প্ৰদৰ্শন কৰি একে নিশাৰ ভিতৰত ১৩৫ ডাল সূতাৰে আঁকি উলিয়ালে এখন চিত্ৰ। মৃদুপৱনৰ এই প্ৰতিভাক এতিয়া প্ৰশংসাৰে উপচাই পেলাইছে সকলোৱে।

বটদ্ৰৱাৰ ৰাইদঙীয়াৰ পহুকটা গাঁৱৰ প্ৰভাত বৰা আৰু বেবী বৰাৰ পুত্ৰ মৃদুপৱন বৰাৰ সৰুৰে পৰাই চিত্ৰ আৰু ভাস্কৰ্য শিল্পৰ প্ৰতি ৰাপ আছে। পূৰ্বেই ৰাজ্যৰ লগতে দেশ-বিদেশৰ বহু শিল্পীৰ ছবি তেওঁ তুলিকাত অংকন কৰিছে। কোনো প্ৰশিক্ষণ অবিহনেই তেওঁ নিৰ্মাণ কৰি আহিছে দেৱী সৰস্বতী, বিশ্বকৰ্মাকে ধৰি দেৱ-দেৱীৰ মূৰ্তি।

জুবিন গাৰ্গ মৃদুপৱনৰ সবাতোকৈ প্ৰিয় শিল্পীগৰাকীৰ নাম। যাৰ বাবে তেওঁ প্ৰিয় শিল্পীগৰাকীক মানস পটত তুলি ধৰাৰ এক অভিনৱ প্ৰচেষ্টা ভাৱি উলিয়ালে। তেওঁ ১৩৫ ডাল সূতাৰে অংকন কৰি উলিয়ালে জুবিন গাৰ্গৰ এখনি ছবি। মাত্ৰ এটা ৰাতিৰ ভিতৰত ইমান সুন্দৰকৈ তেওঁ অংকন কৰা ছবিখনে এতিয়া প্ৰশংসা লাভ কৰিছে। লগতে মৃদুপৱনৰ এক সুন্দৰ ভৱিষ্যতৰো কামনা কৰিছে সকলোৱে।

ছবি আঁকি মূৰ্তি নিৰ্মাণ কৰি বহুত ভালপায় ইয়াৰ পূৰ্বেও এই শিল্পী গৰাকীয়ে বহু চিত্ৰ অংকন কৰিছে আনকি জুৱিনক সেই চিত্ৰ প্ৰদানো কৰিছে।অকল এয়াই নহয় এই শিল্পী গৰাকীয়ে আই স্বৰস্বতীৰ মূৰ্তি আৰু প্ৰতিমাৰ খনিকৰ বিশ্বকৰ্মাৰ মূৰ্তি কোনো প্ৰশিক্ষণ নোলোৱাকৈ মাটিৰে নিৰ্মাণ কৰিছিল।