সৰুপথাৰঃ গোলাঘাট জিলাৰ সৰুপথাৰত মূল্যবৃদ্ধিৰ বিৰুদ্ধে আছুৱে ৰূপায়ণ কৰে প্ৰতিবাদী কাৰ্যসূচী। বিজেপি চৰকাৰ গ’ বেক, পেট্ৰ’লিয়াম মন্ত্ৰী গ’ বেক ধ্বনিৰে মুখৰিত কৰি তোলে সৰুপথাৰ নগৰৰ মাজমজিয়া। লগতে পেট্ৰ’লিয়াম মন্ত্ৰী আৰু যোগান মন্ত্ৰীৰ পুত্তলিকা দাহ কৰি প্ৰতিবাদ সাব্যস্ত কৰে। পেট্ৰ’লজাত সামগ্ৰীৰ লগতে অত্যাৱশ্যকীয় সামগ্ৰীৰ আকাশলংঘী মূল্যবৃদ্ধিৰ পৰিপেক্ষিতত ধনশিৰি মহকুমা ছাত্ৰ সন্থাই হাতত লয় এই প্ৰতিবাদী কাৰ্যসূচী। আজি সৰুপথাৰ নগৰৰ মাজমজিয়াত কেন্দ্ৰীয় পেট্ৰ’লিয়াম মন্ত্ৰী ধৰ্মেন্দ্ৰ প্ৰধান আৰু অসম চৰকাৰৰ খাদ্য আৰু অসামৰিক যোগান মন্ত্ৰী ফণীভূষণ চৌধুৰীৰ পুত্তলিকাও দাহ কৰে ধনশিৰি মহকুমা ছাত্ৰ সন্থাই। শীঘ্ৰেই পেট্ৰ’ল-ডিজেলৰ লগতে অত্যাৱশ্যকীয় সামগ্ৰীৰ মূল্য হ্ৰাসৰ দাবী জনায় আছুৱে। ধনশিৰি মহকুমা ছাত্ৰ সন্থাই কয় যে পেট্ৰ’ল-ডিজেলৰ মূল্যবৃদ্ধিয়ে বেয়াকৈ ক্ষতি কৰিছে সাধাৰণ কৃষকক। খাদ্য সামগ্ৰীৰ মূল্য বৃদ্ধিৰ লগতে ডিজেলৰ মূল্য বৃদ্ধিয়ে কৃষি কৰ্মতো বিৰূপ প্ৰভাৱ পেলোৱাৰ অভিযোগ ধনশিৰি মহকুমা ছাত্ৰ সন্থাৰ। উল্লেখ্য যে বিগত দিনকেইটাত ধাৰাবাহিকভাৱে পেট্ৰ’ল-ডিজেলৰ লগতে অত্যাৱশ্যকীয় সামগ্ৰী অত্যাধিক মূল্যবৃদ্ধিৰ ফলত বেয়াকৈ ক্ষতিগ্ৰস্ত হৈছে সাধাৰণ নাগৰিক।