গুৱাহাটীঃ মুম্বাইত চিকিৎসাধীন হৈ আছে ধুবুৰী লোকসভা সমষ্টিৰ সাংসদ তথা এআইইউডিএফৰ সৰ্বেসৰ্বা বদৰুদ্দিন আজমল। লকডাউন আৰম্ভ হোৱাৰে পূৰ্বে হোজাইত কিছুদিন থকাৰ পিছতে সংসদৰ অধিৱেশনৰ বাবে নতুন দিল্লীলৈ ৰাওনা হৈছিল সাংসদগৰাকী। কিন্তু অসুস্থতাৰ বাবে সংসদৰ অধিৱেশনত ভাগ নলৈ তেওঁ দিল্লীৰ পৰা মুম্বাইলৈ উৰা মাৰে।

মুম্বাইত উপস্থিত হোৱাৰ কিছুদিন পিছতে কিছু পৰিমাণে অসুস্থ হৈ পৰে বদৰুদ্দিন আজমল। লগে লগে তেওঁ চিকিৎসকৰ কাষ চাপে। সম্প্ৰতি তেওঁ কিছু পৰিমাণে সুস্থ হোৱা বুলি এটি সূত্ৰই জনাইছে যদিও বৰ্তমানো চিকিৎসাধীন হৈ থকা বুলি জানিব পৰা গৈছে।

ইফালে, আন এটা সূত্ৰই কৰ’না ৰোগীৰে ভৰি পৰা মুম্বাইত চিকিৎসাধীন হৈ থকা অসমৰ সাংসদগৰাকীও ক’ভিড-১৯ সদৃশ ৰোগত আক্ৰান্ত হোৱাৰ সন্দেহ প্ৰকাশ কৰিছে। সাংসদগৰাকীৰ ভাতৃ চিৰাজুদ্দিন আজমলো চিকিৎসাধীন হৈ থকা বুলি সূত্ৰটোৱে সদৰী কৰিছে।

অৱশ্যে সাংসদগৰাকী আৰু তেওঁৰ ভাতৃ প্ৰকৃততে কি ৰোগত আক্ৰান্ত হৈ আছে সেয়া এই পৰ্যন্ত স্পষ্টকৈ জানিব পৰা হোৱা নাই। স্কাই নিউজ অসমৰ তৰফৰ পৰা এআইইউডিএফৰ কেবাগৰাকী শীৰ্ষ নেতৃত্বৰ সৈতে যোগাযোগ কৰাত তেওঁলোকে সাংসদগৰাকী অসুস্থ হৈ পৰিলেও স্বাস্থ্যৰ অৱনতি ঘটা নাই বুলি জনাইছে।

সেয়া হ’লেও সাংসদগৰাকী চিকিৎসাধীন হৈ থকাৰ বাতৰি লাভ কৰি উদ্বিগ্ন হৈ পৰিছে এইআইইডিএফ দলৰ কৰ্মকৰ্তাসকলৰ লগতে আজমলৰ হাজাৰ হাজাৰ অনুৰাগী। ছ’চিয়েল মিডিয়াত অনুৰাগীসকলে কৰ’নাময় হৈ পৰা মুম্বাইত থকা সাংসদগৰাকীক যাতে কোনো কাৰণতে ভাইৰাছবিধে সংক্ৰমিত কৰিব নোৱাৰে তাৰ বাবে নেদেখাজনৰ ওচৰত প্ৰাৰ্থনা জনোৱাও দেখা গৈছে।