বেবেজীয়াঃ নিৰ্বাচন সমাগত৷ এতিয়া ৰাজ্যত আধাৰশিলা স্থাপনৰ ৰাজনীতি আৰম্ভ হৈছে৷ সমানে নগাঁও জিলাৰ বটদ্ৰৱা বিধান সভা সমষ্টিত আধাৰশিলা স্থাপনৰ ৰাজনীতি আৰম্ভ হৈছে৷ বিগত কেইবাটাও দিনত কেইবাটাও আঁচনিৰ আধাৰশিলা স্থাপন লগতে শুকুৰবাৰে দলংঘাট উন্নয়ন খণ্ডৰ জামুগুৰি-কুজিদাঁহ গাঁও পঞ্চায়তত বিধায়িকা আঙুৰলতা ডেকাই দুটাকৈ পথৰ আধাৰশিলা স্থাপন কৰে৷ আনহাতে এটা সামূহিকভৱন উদ্ধোধন কৰাৰ লগতে কেইবাটাও নামঘৰত বিধায়ক উন্নয়ন পুঁজিৰ অনুদান চেক বিতৰণ কৰে স্থানীয় বিধায়িকা আঙুৰলতা ডেকাই৷

গড়কাপ্তানী (পথ) বিভাগৰ তত্ত্বাৱধানত ৰাজ্যৰ স্ব-শিতানৰ অগ্ৰাধিকাৰ দাবী অনুমোদিত আঁচনিৰ ২০১৯-২০ বৰ্ষৰ অধীনত নিৰ্মাণ হ’বলগীয়া ৩নং ৰাজ্যিক পথৰ পৰা জামুগুৰি সংযোগী আৰু কুজিদাঁহ-হাতীচোং মহাবিদ্যালয় সংযোগী পথ দুটাৰ আধাৰশিলা স্থাপন কৰাৰ পিছত চতুৰ্দশ বিত্তীয় আয়োগৰ আৱণ্টিত পুঁজিৰে নিৰ্মিত কুজিদাঁহ শ্ৰীমন্ত শংকৰ চ’ৰা কলা পৰিষদৰ সমূহীয়া ভৱনৰ শুভ উদ্বোধন কৰে৷

উক্ত পঞ্চায়তৰ দহটাকৈ নামঘৰত উন্নয়ণমূলক কামৰ আৰ্থিক অনুদানৰ চেক বিতৰণ কৰে বিধায়িকাগৰাকীয়ে৷ এই আধাৰশিলা স্থাপন অনুষ্ঠানত বিধায়িকাগৰাকীয়ে বিজেপি নেতৃত্বাধীন মিত্ৰ জোঁটৰ চৰকাৰখনে অসমৰ ৰাইজৰ বাবে কৰি অহা বিভিন্ন উন্নয়নমূলক আঁচনিসমূহৰ দ্বাৰা গ্ৰামাঞ্চলৰ ৰাইজ কেনেদৰে উপকৃত হৈছে সেই বিষয়ে উপস্থিত ৰাইজৰ সন্মুখত ব্যক্ত কৰে৷ এই আধাৰশিলা স্থাপন অনুষ্ঠানত গড়কাপ্তানি (পথ) বিভাগৰ সহকাৰী অভিযন্তা হিমাংশু দাস, কনিষ্ঠ অভিযন্তা অসীম কুমাৰ নাথ, দলংঘাট উন্নয়ন খণ্ডৰ কনিষ্ঠ অভিযন্তা হৰমোহন হালৈ, হাতীচোং জিলা পৰিষদৰ সদস্যা সীমাৰেখা ভড়ালী, জামুগুৰি-কুজিদাঁহ গাঁও পঞ্চায়তৰ সভাপতি কৌস্তুভ কুমাৰ বৰা, কাউন্সিলৰ ভদ্ৰ বৰা, জামুগুৰি-কুজিদাঁহ মণ্ডল বিজেপিৰ জ্যেষ্ঠ বিষয়-ববীয়াসকল উপস্থিত থাকে৷