শিৱসাগৰঃ সৰ্পই দংশন কৰা এগৰাকী মহিলাৰ মৃত্যুক লৈ শিৱসাগৰ অসামৰিক চিকিৎসালয়ত যোৱা নিশা উত্তপ্ত পৰিস্থিতিৰ সৃষ্টি হয়৷ ক’ভিড-১৯ পৰীক্ষাৰ বাবে বহু সময় অপব্যয় কৰাৰ বাবে সৰ্পই দংশন কৰা এগৰাকী মহিলাৰ মৃত্যু ঘটা বুলি অভিযোগ উত্থাপন কৰিছে মৃত মহিলাগৰাকীৰ পৰিয়ালে৷ অভিযোগ মতে, চিকিৎসালয়খনৰ চিকিৎসক মন্দাকিনী দত্তৰ গাফিলতিৰ বাবেই মহিলাগৰাকীৰ মৃত্যু হয়৷ চিকিৎসক ডাঃ মন্দাকিনী দত্তৰ বিৰুদ্ধে জয়সাগৰ আৰক্ষী চকীত এজাহাৰ দাখিল কৰিছে মৃত মহিলাগৰাকীৰ স্বামীয়ে৷ মৃত মহিলাগৰাকীৰ নাম চণ্ডিকা হাজৰিকা(২৬)৷ তেওঁৰ ঘৰ নাজিৰা আমোলাপট্টিৰ ৭ নম্বৰ ৱাৰ্ডত৷

পৰিয়ালৰ লোকে অভিযোগ কৰা অনুসৰি চণ্ডিকা হাজৰিকাক শনিবাৰে সন্ধিয়া ৭ মান বজাত সাপে দংশন কৰাত ততাতৈয়াকে সন্ধিয়া ৭.৪৫ বজাত শিৱসাগৰ অসামৰিক চিকিৎসালয়ত ভৰ্তি কৰে যদিও চিকিৎসালয়খনত সেই সময়ত কৰ্মৰত চিকিৎসক ডাঃ মন্দাকিনী দত্তই এটা চেলাইন দিয়েই দায়িত্ব শেষ কৰে। আনহাতে, সৰ্পই দংশন কৰা দুই সন্তানৰ মাতৃ মহিলাগৰাকীক এণ্টিভেনম প্ৰয়োগ কৰাতো গাফিলতি কৰাৰ অভিযোগ উত্থাপিত কৰে মৃত মহিলাগৰাকীৰ পৰিয়ালে৷