মহাৰাষ্ট্ৰত মালবাহী ৰেলৰ খুন্দাত ১৫ শ্ৰমিকৰ কৰুণ মৃত্যু
- Update Time : Saturday, May 9, 2020
- 135 Time View
মুম্বাইঃ বিপদৰ ওপৰত বিপদ। এফালে কৰ’না আতংক, আনফালে বিশাখাপট্টনমত বিষাক্ত গেছ নিৰ্গত। তাৰ মাজতে শুকুৰবাৰে নিচেই পুৱাতে মহাৰাষ্ট্ৰৰ ঔৰংগাবাদত সংঘটিত হয় এক শোকাৱহ ৰেল দুৰ্ঘটনা।
এই দুৰ্ঘটনাত এখন মালবাহী ৰেলে একেলগে ১৫ জনকৈ শ্ৰমিকক মহতিয়াই যায়। ফলত থিতাতে নিহত হয় আটাইকেইজন শ্ৰমিক। আহত হয় আন কেবাজনো। স্থানীয় প্ৰশাসনে শ্ৰমিককেইজন মধ্যপ্ৰদেশৰ পৰা ৰেলপথেৰে খোজকাঢ়ি ঘৰমুৱা হৈছিল বুলি জনাইছে।
‘শ্ৰমিকসকলে ৰেলপথেৰেই খোজকাঢ়ি গৈ আছিল। একেৰাহে দীৰ্ঘ সময় ধৰি খোজকাঢ়ি থকাৰ ফলত তেওঁলোকে হয়তো শুনাৰ শক্তি হেৰুৱাই পেলাইছিল। সেয়ে ৰেল অহাৰ উমানেই নাপালে।’-এইদৰে স্থানীয় এটা টিভি চেনেলৰ আগত জনাইছে এগৰাকী বিষয়াই।
বিষয়াগৰাকীয়ে শ্ৰমিককেইজনে নিশাৰ ভাগত ৰেলপথতে ভাগৰত শুই পৰাৰো অনুমান কৰিছে। তেওঁ কয় যে শ্ৰমিককেইজন হয়তো নিশা ৰেলপথতে শুই পৰিছিল আৰু পুৱা প্ৰায় ৫.৩০ বজাত সাৰ পোৱাৰ আগতেই মালবাহী ৰেলখন তেওঁলোকৰ গাৰ ওপৰেৰে পাৰ হৈ গৈছিল।
