গুৱাহাটীঃ ক’ৰোনাৰ সংহাৰী ৰূপ তথা লক-ডাউনৰ মাজতে ৰাজনৈতিক দলসমূহে কুচ-কাৱাজ অব্যাহত ৰাখিছে৷ শাসকীয় বিজেপি দলে জন-সম্পৰ্ক অভিযান চলাই থকাৰ লগতে বিৰোধী কংগ্ৰেছ আৰু ইউডিএফেও ৰাজনৈতিক দৌৰ আৰম্ভ কৰিছে৷ শাসকীয় বিজেপি দলৰ সহযোগী দল আঞ্চলিক দল অসম গণ পৰিষদেও দলক শক্তিশালী কৰিবলৈ উঠি-পৰি লাগিছে৷ শুকুৰবাৰে আমবাৰীস্থিত মুখ্য কাৰ্যালয়ত সভাপতি অতুল বৰাৰ উপস্থিতিত গুৰুত্বপূৰ্ণ সভা অনুষ্ঠিত হয়। দলৰ প্ৰাক্তন সভাপতি তথা প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ অনুপস্থিতিত অনুষ্ঠিত সভাত দলৰ সাংগঠনিক দিশ সন্দৰ্ভত কেইবাটাও সিদ্ধান্ত গ্ৰহণ কৰে।

মন্ত্ৰী দলৰ কাৰ্যকৰী সভাপতি কেশৱ মহন্তৰ সভাপতিত্বত অনুষ্ঠিত সভাত ২০২১ৰ নিৰ্বাচনৰ প্ৰতি লক্ষ্য ৰাখি দলীয় বিষয়-ববীয়া আৰু সদস্যসকলৰ সক্ৰিয় কৰিবলৈ আৰু ছ’চিয়েল মিডিয়াৰ জৰিয়তে দলৰ ব্যাপক প্ৰচাৰ আৰু প্ৰসাৰ বৃদ্ধিৰ বাবে কেইবাটাও সিদ্ধান্ত গ্ৰহণ কৰে দলটোৱে। সভাত ১৯৮৫ চনৰ পৰা বিভিন্ন সময়ত জয়লাভ কৰা ৮৫টা সমষ্টিক লক্ষ্য কৰি তৎপৰতা আৰম্ভ কৰাৰ লগতে ৫০ শতাংশৰো অধিক ছ’চিয়েল মিডিয়াৰ যাৱতীয় প্ৰস্তুতি সম্পূৰ্ণ কৰি তোলাৰ লগতে অহা ৭ দিনৰ ভিতৰত অন্যান্য সমষ্টি সমূহতো এই প্ৰক্ৰিয়া সম্পূৰ্ণ কৰিব বুলি চৰ্চা হোৱা বুলি জানিব পাৰ যায়৷

ইতিমধ্যে দলে ছ’চিয়েল মিডিয়াৰ বাবে নিয়োজিত সমষ্টিসমূহৰ দায়িত্বপ্ৰাপ্ত সদস্যসকলক গুৱাহাটীত এই মাহৰ শেষৰফালে বিশেষ প্ৰশিক্ষণৰ ব্যৱস্থা কৰাৰ উপৰিও জিলা আৰু সমষ্টিসমূহৰ সভাপতি, সম্পাদকসকলক লৈ অহা জুলাইৰ প্ৰথম সপ্তাহত আন এখন গুৰুত্বপূৰ্ণ সভা অনুষ্ঠিত হ’ব।

সভাত দলৰ সভাপতি তথা মন্ত্ৰী অতুল বৰা জ্যেষ্ঠ নেতা তথা মন্ত্ৰী ফণীভূষণ চৌধুৰী, সাধাৰণ সম্পাদক ডা০ কমলা কলিতা, বীৰেন্দ্ৰ প্ৰসাদ বৈশ্য, নুৰুল হুছেইন, ভূপেন ৰায়, প্ৰবীণ হাজৰিকা, সত্যব্ৰত কলিতা, মনোজ শইকীয়া উপস্থিত থাকে।

এই বৈঠকৰ পিছতে দলৰ ভাতৃ সংগঠন অসম যুৱ পৰিষদ, অসম মহিলা পৰিষদ আৰু অসম ছাত্ৰ পৰিষদৰ বিষয়ববীয়াসকলৰ আন এক বৈঠক অনুষ্ঠিত হয়৷ ভাতৃ সংগঠন সমূহৰ বাবে দলে কাৰ্যসূচী ঘোষণা কৰে।

অসম গণ পৰিষদৰ কেন্দ্ৰীয় সমিতিৰ নিৰ্দেশ মৰ্মে ২০ জুনত কলাগুৰু বিষ্ণুপ্ৰসাদ ৰাভা স্মৃতি দিৱস অসম যুৱ পৰিষদ আৰু অসম ছাত্ৰ পৰিষদে ৰাজ্যজুৰি অনুষ্টুপীয়াকৈ উদযাপন কৰিব। শ্ৰদ্ধাঞ্জলি তৰ্পণ আৰু বন্তি প্ৰজ্বলনেৰে সামাজিক দূৰত্ব ৰক্ষা কৰি বিষ্ণু ৰাভা দিৱস উদযাপন কৰিবলৈ কেন্দ্ৰীয় সমিতিয়ে অসম যুৱ পৰিষদ আৰু অসম ছাত্ৰ পৰিষদক দায়িত্ব অৰ্পণ কৰে।