বৰপেটাৰোডঃ নামনি অসমৰ বাণিজ্য নগৰী ৰূপে খ্যাত বৰপেটাৰোডৰ চৰকাৰী চিকিৎসালয় এতিয়া ক’ৰোনাৰ অভিকেন্দ্ৰ হৈ পৰিছে৷ বুধবাৰে ৪জনকৈ চিকিৎসক আৰু স্বাস্থ্যকৰ্মী পজিটিভ ধৰা পৰাৰ পিছতে বৃহস্পতিবাৰে চিকিৎসক, নাৰ্চ আৰু চিকিৎসালয়ৰ আৱাসীক এলেকাৰ লোকসহ মুঠ ১৬জন পজিটিভ ৰোগী ধৰা পৰাত চিকিৎসালয়খনত আতংকময় পৰিৱেশৰ সৃষ্টি হৈছে৷

প্ৰসূতি আৰু স্ত্ৰী ৰোগ বিভাগৰ জ্যেষ্ঠ চিকিৎসক ডা০ পৰেশ কলিতা, নাৰ্চ মৃদুলা দাসো পজিটিভ ধৰা পৰিছে৷ আনহাতে আৱাসী চালিনী সৰকাৰ (১৮), ৰীয়া কলিতা (১৫), ধীতাশ্ৰী দাস (২০), ৰেখা দাস (৪৫), ৰুমী দাস (২৩), নিলীমা দাস (৩৫), হিমজ্যোতি দাস (১৭), সুদেস্না সৰকাৰ (২৭), ৰাজকমল শৰ্মা (৫৬), আলমীনা বেগম (২৪), বনজিৎ দাস (৩৯), জামিনী দাস (৬৫), বাৰ্বী ৰয় (৮) আৰু দিপাঞ্জলী কলিতা (৩৪) ক’ৰোনাত আক্ৰান্ত হয়৷

বুধবাৰে ক’ৰোনাৰ পৰীক্ষা কৰাৰ পিছতে চিকিৎসালয়খনৰ উপ-অধীক্ষক ডা০ সঞ্জীৱ কুমাৰ সৰকাৰ, জ্যেষ্ঠ চিকিৎসা বিষয়া ডা০ মনোজ চৌধুৰী, ওটি ষ্টাফ নাৰ্চ ৰূপাঞ্জলী কলিতা আৰু ওটি ৱাৰ্ড বয় প্ৰদীপ দাসৰ কোভিড-১৯ পজিটিভ পোৱা গৈছিল৷ চিকিৎসালয়খনৰ চিকিৎসক, নাৰ্চ, স্বাস্থ্য কৰ্মী আৰু কোৱাৰ্টাৰত থকা পৰিয়ালৰ লোকসকল এনেদৰে কোভিভ পজিটিভ ধৰা পৰাত আজিৰে পৰা বহিঃ বিভাগ, নৰ্মেল আৰু চিজাৰিয়ান ডেলীভাৰী বন্ধ কৰি দিয়া হৈছে৷ মাত্ৰ ইমাৰজেন্সী সেৱাহে চলি থাকিব৷

ফলত এতিয়া ৰোগীসকলৰ মাজত হাহাকাৰৰ সৃষ্টি হৈছে৷ উল্লেখ্য যে, ৰাজ্য চৰকাৰে চৰকাৰী চিকিৎসকসকলৰ ক’ৰোনাৰ বাবে প্ৰাইভেট প্ৰেক্টিছ কৰাটো বন্ধ কৰি দিয়াৰ কৰাৰ পিছতো চিকিৎসলয়খনত কৰ্মৰত দুজনমান চিকিৎসকে প্ৰাইভেট প্ৰেক্টিছ কৰি থকা বুলি অভিযোগ উঠিছে৷