বৰপেটা ৰোডঃ কৃষি উন্নয়নৰ বাবে ৰাজ্য চৰকাৰে ঢাক-ঢোল বজাই প্ৰচাৰ চলালেও ৰাজ্যৰ কৃষক সকলৰ অৱস্থা এতিয়া তথৈবচ। বানে বহু কৃষকৰ সপোনৰ খেতিডৰা ধুৱাই নিয়াৰ পিছত এতিয়া পথাৰত তাণ্ডৱ চলাইছে শুৰ পোক আৰু মাজাৰ পোকে। ৰাজ্যৰ আন প্ৰান্ত সমূহৰ দৰে বৰপেটা ৰোডৰ উত্তৰ প্ৰান্ততো এতিয়া খেতিয়কসকলে মূৰে কপালে হাত দিছে শুৰ আৰু মাজাৰ পোকৰ উৎপাতত।

অশেষ কষ্টৰ পাছত সোণোৱালী হৈ পৰা ধাননি পথাৰখন এফালৰ পৰা নষ্ট কৰি গৈছে শুৰ আৰু মাজাৰ পোকে। যাৰ ফলত এতিয়া উপায়ন্তৰ হৈ পৰিছে অঞ্চলটোৰ কৃষক ৰাইজ। জীৱিকাৰ একমাত্ৰ ভৰসা খেতিপথাৰখন এনেদৰে নষ্ট হৈ যোৱাত হাহাকাৰ কৰিব লগা হৈছে খেতিয়কসকলে।

খেতিকেই জীৱিকা হিচাপে বাচি লোৱা অঞ্চলটোৰ এজন কৃষকৰ নাম হৈছে হিতেশ ব্ৰহ্ম। কোৰোনা মহামাৰী আৰু লকডাউনৰ সময়ছোৱাত সূদলৈ টকা আনি তেওঁ কৰিছিল খেতি। প্ৰতিবিঘা মাটিত তেওঁৰ খৰছ হৈছিল ৫-৬ হাজাৰ টকা। কিন্তু এতিয়া শুৰ পোক আৰু মাজাৰ পোকৰ সন্ত্ৰাসত তেওঁ নিৰূপায় হৈ পৰিছে। চকুৰ সন্মুখতে খেতিডৰা নষ্ট হৈ যোৱা দেখি হিতেশ ব্ৰহ্মৰ এতিয়া ভাগি পৰিছে মন।

হিতেশ ব্ৰহ্মৰ দৰে খেতিয়কসকলে এতিয়া নিজৰ খেতিডৰা বচোৱাৰ খাতিৰত চৰকাৰৰ ওচৰত আহ্বান জনাইছে। ৰাজ্যৰ বিয়াগোম কৃষি বিভাগটোৱে শীত তাপ নিয়ন্ত্ৰিত কোঠাৰ পৰা যোজনা প্ৰস্তুত কৰাৰ বিপৰীতে সাধাৰণ খেতিয়কসকলৰ সমস্যাসমূহ দূৰ কৰাৰ বাবে প্ৰচেষ্টা হাতত ল’বলৈ আহ্বান জনাইছে কৃষক ৰাইজে।