লিজা দাস, গোলাঘাটঃ গোলাঘাট জিলাৰ উপায়ুক্তই এগৰাকী চিকিৎসকৰ বিৰুদ্ধে তদন্ত ঘোষণা কৰিছে৷ চিকিৎসকগৰাকীয়ে ব্যক্তিগত হস্পিতালত চিকিৎসা কৰিবলৈ গৈ ক’ৰোনাত আক্ৰান্ত হোৱাৰ পিছতে তদন্ত ঘোষণা কৰিছে গোলাঘাট জিলা উপায়ুক্তই বিভাষ চন্দ্ৰ মোদীয়ে৷ দেৰগাঁৱৰ ডা০ ৰূপম গগৈ নামৰ চিকিৎসকগৰাকীৰ বিৰুদ্ধে জিলা উপায়ুক্তই দণ্ডাধীশ পৰ্যায়ৰ তদন্ত ঘোষণা কৰিছে।

জানিব পৰা মতে, দেৰগাঁৱ চিএইচইত কৰ্মৰত চৰকাৰী চিকিৎসক ডা০ গগৈয়ে জিলা প্ৰশাসনৰ অজ্ঞাতে গোলাঘাটৰ ব্যক্তিগত খণ্ডৰ লাইফ লাইন হস্পিতালত কাম কৰিছিল। ব্যক্তিগত খণ্ডৰ লাইফ লাইন হস্পিতাল খনৰ কৰ্মচাৰী জয়ন্ত সিনহাৰ সংস্পৰ্শলৈ আহি কোৱিড-১৯ত আক্ৰান্ত হৈছিল ডা০ ৰূপম গগৈ।

চিকিৎসকজনৰ নমুনা পৰীক্ষাত পজিটিভ অহাত সমগ্ৰ বিষয়টো পোহৰলৈ আহে। লগে লগে জিলা উপায়ুক্তগৰাকীয়ে বিষয়টোৰ তদন্ত কৰাৰ ঘোষণা কৰে।কোৱিডত আক্ৰান্ত চিকিৎসকজন যোৱা দিন কেইটাত দেৰগাঁৱৰ চৰকাৰী চিকিৎসালয়ত ৰোগী চোৱা-চিতা কৰিছিল। তেনে ক্ষেত্ৰত চিকিৎসকজনৰ পৰা ৰোগীৰ দেহলৈ ভাইৰাছ সংক্ৰমণ হোৱাৰ আশংকা কৰি আতংকিত দেৰগাঁওবাসী৷