প্ৰাণদ্বীপ চেতিয়া, বোকাজানঃ মহামাৰীৰ ভয়ংকৰ বিপদকালত চিকিৎসক তথা স্বাস্থ্যকৰ্মীসকলে মানৱ জাতিলৈ আগবঢ়োৱা সেৱাৰ বাবে মানৱ জাতি আজি কৃতজ্ঞ৷ চিকিৎসক তথা স্বাস্থ্যকৰ্মীসকৰ স্থান মানৱ সমাজত সদায়েই শিখৰত। এক কথাত সকলোৱেই এই সেৱাৰ সৈতে জড়িত লোকক ভগৱান বুলিয়েই জ্ঞান কৰে। কিয়নো ভগৱানে জীৱন দিলেও জীয়াই ৰাখে চিকিৎসকসকলেহে। কিন্তু ভগৱান বুলি গণ্য কৰা এই সেৱাৰ সৈতে জড়িত কোনোবাজনৰ লোকৰ বাবে এটা এটা পৰিয়ালত নিমিষতে সৰগ ভাঙি পৰে৷ কেতিয়াবা একাংশ চিকিৎসক তথা স্বাস্থ্যকৰ্মীৰ অৱহেলাৰ বাবে বহু নিৰীহলোকে প্ৰাণ হেৰুৱাবলগীয়া হোৱাৰ খবৰ প্ৰচাৰ হয়।

তেনেই এক কাণ্ড সংঘটিত হৈছে কাৰ্বি আংলঙৰ বোকাজানত৷ বোকাজানৰ দয়ালবস্তিৰ বাসিন্দা শংকৰ মিৰ্ধা নামৰ লোকজনৰ একমাত্ৰ সন্তানৰ অকাল মৃত্যুৰ বাতৰিয়ে বোকাজান মহকুমাত চাঞ্চল্যৰ সৃষ্টি কৰিছে। বোকাজানৰ দয়ালবস্তিৰ দৰিদ্ৰ শংকৰ মিৰ্ধা আৰু সৰস্বতী মিৰ্ধাই দিন হাজিৰা কৰি পোহপাল দিয়া সন্তানটোৱে অকালতে চিকিৎসাৰ অভাৱত মৃত্যুক আকোৱালি লয়৷ কিছুদিন ধৰি একমাত্ৰ পুত্ৰ সন্তান শিৱই বুকুৰ এক ৰোগত আক্ৰান্ত হয়। গাঁৱৰ ৰাইজে পাৰ্যমানে আৰ্থিক সহায় আগবঢ়াই দুৰ্ভগীয়া পৰিয়ালৰ পুত্ৰৰ আৰোগ্যৰ কামনা কৰিছিল। কিন্তু নিষ্ঠুৰ নিয়তিৰ কি পৰিহাস, ভগৱানৰূপী চিকিৎসক তথা স্বাস্থ্যকৰ্মীৰ হেমাহিৰ বাবে ৪ বছৰীয়া শিৱই অকালতে প্ৰাণ হেৰুৱাব লগা হ’ল বুলি অভিযোগ উত্থাপন হৈছে৷

বৃহস্পতিবাৰে শংকৰ মিৰ্ধাই একমাত্ৰ সন্তান শিৱক দেখুৱাবলৈ আনিছিল বোকাজান সমূহীয়া স্বাস্থ্য কেন্দ্ৰত। কিন্তু চিকিৎসকে লিখি দিয়া এটা বেজি ১ ঘণ্টা লৈকে দিবলৈ নাছিল কোনো নাৰ্চ তথা স্বাস্থ্যকৰ্মী। বোকাজান সমূহীয়া স্বাস্থ্য কেন্দ্ৰত কোনো ধৰণৰ চিকিৎসা নাপায় দুৰ্ভগীয়া পৰিয়ালটোৱে বোকাজানৰ এখন ব্যক্তিগত চেম্বাৰ ডা০ বৰুৱা ক্লিনিকত ভৰ্তি কৰাই কণমানিক। পৰৱৰ্তী সময়ত ডা০ বৰুৱাই চিকিৎসা কৰি গধূলি সময়ত ঘৰলৈ যাবলৈ দিয়ে কণমানি শিশুক। চিকিৎসাৰ পিছতে অলপ সুস্থ হৈছিল যদিও ৰাতিলৈ শিশুটিৰ স্বাস্থ্যৰ অধিক অৱনতি ঘটে।

শুকুৰবাৰে পিতৃ-মাতৃয়ে পুত্ৰক পুনৰ বোকাজান সমূহীয়া স্বাস্থ্য কেন্দ্ৰলৈ আনিছিল যদিও তেতিয়ালৈকে চিকিৎসকে কণমানিটিক মৃত বুলি ঘোষণা কৰে। উল্লেখ্য যে, বোকাজান খণ্ড প্ৰাথমিক চিকিৎসালয়ৰ স্বাস্থ্যকৰ্মীৰ অৱহেলাৰ লগতে ব্যক্তিগত ক্লিনিকৰ চিকিৎসক ডা০ বৰুৱাৰ ওপৰতো ভুল চিকিৎসাৰ অভিযোগ উত্থাপন কৰে দুৰ্ভগীয়া পৰিয়ালটোৱে। আনহাতে বোকাজান নগৰৰ ব্যক্তিগত চেম্বাৰ ডা০ বৰুৱা ক্লিনিকৰ বিতৰ্কিত চিকিৎসকজনৰ বিৰুদ্ধে ভুল চিকিৎসাৰ বাবেই শুকানজানৰ বাসিন্দা উজ্জ্বল নেওগ নামৰ এজন উদীয়মান যুৱকে চলিত বৰ্ষৰ ৯ মে’ত অকাল মৃত্যুক আকোৱালী লবলগীয়া হোৱাৰ অভিযোগো আছে।

সেই সময়ত বোকাজানৰ বিভিন্ন জাতীয় সংগঠন তথা সাংবাদিকে উক্ত ঘটনাৰ দণ্ডাধীশ পৰ্যায়ত তদন্ত কৰিব লাগে বুলি বোকাজান মহকুমাৰ মহকুমাধিপতিক অনুৰোধ জনায় আৰু তাৰ পৰিপ্ৰেক্ষিততেই মহকুমাধিপতি দিলীপ তেৰাঙে অতিৰিক্ত সহকাৰী আয়ুক্ত তাহিৰ আলমক দায়িত্ব অৰ্পণ কৰিছিল। মহকুমাধিপতিৰ নিৰ্দেশমৰ্মে অতিৰিক্ত সহকাৰী আয়ুক্ত তাহিৰ আলমে বোকাজান খণ্ড প্ৰাথমিক স্বাস্থ্য কেন্দ্ৰৰ ভাৰপ্ৰাপ্ত মহকুমা চিকিৎসা আৰু স্বাস্থ্য বিষয়া দেৱৰাজ দেউৰীৰ সহযোগত তদন্ত প্ৰক্ৰিয়া আৰম্ভ কৰে। কিন্তু তাৎপৰ্যপূৰ্ণ কথা যে দুটা মাহ পাৰ হৈ যোৱাৰ পিছতো উক্ত ঘটনা সন্দৰ্ভত তদন্ত সমিতিয়ে তেওঁলোকৰ প্ৰতিবেদনত কি দাখিল কৰিলে সেয়া বৰ্তমানলৈকে ৰাজহুৱা কৰা নাই বোকাজান মহকুমা প্ৰশাসনে। উল্লেখ্য যে, বোকাজান মহকুমা প্ৰশাসনৰ তত্বাৱধানত উদীয়মান যুৱক উজ্জ্বল নেওগৰ মৃত্যুৰ সমগ্ৰ তদন্ত প্ৰক্ৰিয়াক বৰ্তমান সন্দেহৰ দৃষ্টিৰে চাবলৈ লৈছে স্থানীয় ৰাইজে।