নগাঁৱৰ পৰা জয়ন্ত মুদৈঃ আন্তঃৰাষ্ট্ৰীয় খ্যাতিসম্পন্ন নাট্যসম্ৰাট পদ্মশ্ৰী এইচ কানহাইলালৰ প্ৰকল্পৰ আৰ্হিত অসমত বাদুংদ্যুপ্পাৰ জৰিয়তে বিশিষ্ট নাট্যশিল্পী প্ৰয়াত শুক্ৰাচাৰ্য ৰাভাই আৰম্ভ কৰিছিল নাট উপস্থাপনৰ এক ব্যতিক্ৰমী ধাৰা ৷ সেই মৰ্মে, ৰাভাই গোৱালপাৰা জিলাৰ অগিয়া ৰামপুৰ গাঁৱত তেওঁ ‘আণ্ডাৰ দা ছাল ট্ৰি’ শীৰ্ষক নাট্য মহোৎসৱ অনুষ্ঠিত কৰিছিল । শুক্ৰাচাৰ্য ৰাভাই অসমত জন্ম দি থৈ যোৱা সেই ব্যতিক্ৰমী আৰু বিশ্বৰ বিৰল নাট্যধাৰাৰ অনুকৰণত নগাঁও জিলাৰ বেবেজীয়াৰ মুকলি পথাৰৰ ভৰপূৰ প্ৰাকৃতিক পৰিবেশত দুদিনীয়াকৈ অনুষ্ঠিত হোৱা ৰ’দঘাই বেবেজীয়াৰ নাট সমাৰোহৰ দেওবাৰে বিয়লি সামৰণি পৰে ৷ দৰ্শক ৰাইজৰ বিপুল সঁহাৰিৰ মাজেৰে নাট মহোৎসৱৰ প্ৰথম দিনা ৰ’দঘাই বেবেজীয়াই “অকণিৰ ধেমালি”, জামুগুৰিৰ জংগম গোষ্ঠীয়ে “দোলা”, পুৰণিগুদামৰ ৰংগালয়ে “মাউখ”, ৰ’দঘাই বেবেজীয়াই “হেঁপাহ” মঞ্চস্থ কৰাৰ বিপৰীতে দ্বিতীয় দিনা জ্যোতি ৰংগমঞ্চই “এক বৃক্ষ শত পুত্ৰ সম”, নগাঁৱৰ শতাব্দীয়ে বিশ্বজিত বৰঠাকুৰৰ ৰছনা আৰু পৰিচালনাৰে “সময়-এক দুঃসময়” আৰু আমোলাপট্টিৰ অকণিৰ মইনা পাৰিজাতে “ফচক কলি ডট কম” শীৰ্ষক নাটকেইখন মঞ্চস্থ কৰে ৷ দুয়োদিনৰে নাটকৰ বিৰতিত ৰ’দঘাই বেবেজীয়াৰ সম্পাদক ৰঞ্জন হাজৰিকা আৰু অন্যতম উদ্যোক্তা নাট্যশিল্পী দ্বীপ বৰাই অনুষ্ঠানৰ আঁত ধৰে ৷ এইবাৰ প্লাষ্টিক বৰ্জিত সম্পূৰ্ণ প্ৰাকৃতিক পৰিবেশত ইকৰা-নল-খাগৰি আৰু বাহেঁৰে তথা মাটি ভেটীৰে তৈয়াৰী মুকলি মঞ্চত নাটক উপভোগ কৰিবলৈ ৰ’দঘাই বেবেজীয়াৰ নাট মহোৎসৱ স্থলীলৈ অগণন নাট্যপ্ৰেমী দৰ্শকৰ সোঁত বোৱা পৰিলক্ষিত হয় ৷ উল্লেখ্য, নাট প্ৰদৰ্শন কৰিবলৈ অহা শিল্পী, কলা-কুশলীৰ লগতে অভ্যাগত অতিথি আৰু দূৰ-দুৰণিৰ পৰা নাট উপভোগ কৰিবলৈ অহা দৰ্শকসকলকো উদ্যোক্তাসকলে আতিথ্যৰ কোনো ত্ৰুটি নকৰাকৈ তিলপিঠা, লাৰু, বৰপিঠা আদিৰে লঘু আহাৰৰ লগতে দুপৰীয়া অসমীয়া জুতিলগা এসাঁজ ভাতেৰে আপ্যায়ন কৰি বেবেজীয়াবাসীৰ অতিথিপৰায়ণ সাংস্কৃতিক মনৰো পৰিচয় দিয়ে ৷