লোহিত চন্দ্ৰ শালৈ, ছয়গাঁওঃ শাল গছে আৱৰা প্ৰাকৃতিক পৰিবেশত অনুষ্ঠিত হয় ছয়গাঁৱৰ ৩২তম খৰখৰী আঞ্চলিক ৰঙালী বিহু সন্মিলন-সুঁৱৰি উৎসৱ৷ বিহু সন্মিলনত খৰখৰী বিহুতলীত বন্যপ্ৰাণী আৰু বন সংৰক্ষণ সম্পৰ্কে ৰাইজক সজাগ কৰাৰ উদ্দেশ্যে উদ্যক্তাসকলে আজি প্ৰায় তিনিশতাধিক গছপুলি বিতৰণ কৰে। এখন সভাত পশ্চিম কামৰূপ বন সংমণ্ডল বিষয়া ডিম্পী বৰাই মানুহে গছপুলি ৰোপন কৰাৰ লগতে এই গছপুলিবোৰ নিজৰ সন্তানৰ দৰে পৰিচৰ্যা কৰি সংৰক্ষণ কৰিবলৈ আহ্বান জনায়। তদুপৰি শিহু, হাড়গিলাকে ধৰি সকলো ধৰণৰ বন্যপ্ৰাণী সংৰক্ষণৰ বাবাবে আগবাঢ়ি আহিবলৈ ৰাইজলৈ আহ্বান জনায়। সভাত ছয়গাঁও ৰাজহ চক্ৰৰ সংলগ্ন চক্ৰ বিষয়া অম্বৰীশ বৰা আৰু ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া ভগবান দাস উপস্থিত থাকি বন্যপ্ৰাণী তথা গছ-গছনি সংৰক্ষণৰ প্ৰয়োজনীয়তা সম্পৰ্কে বিস্তৃত বাখ্যা আগবঢ়াই। ১২ মে’ত এদিনীয়াকৈ অনুষ্ঠিত বিহু ও সুৱৰী উৎসৱত পুৱা তেলীয়া গছত উঠা, চকুত কাপোৰ বান্ধি হাঁহ ধৰা আদি বিভিন্ন খেল-ধেমালি প্ৰতিযোগিতা অনুষ্ঠিত হয়। আনহাতে আবেলি মাকেলী গোপাল গোসাই দধিমণ্ঠন দলৰ শিল্পীসকলে দধিমণ্ঠন প্ৰদৰ্শন কৰে।