বিশ্বনাথঃ আজি বিশ্বনাথ জিলা আৰক্ষীৰ উদ্যোগত বিশ্বনাথৰ পানীভৰালত গ্ৰহণ কৰা হ’ল নিষিদ্ধ গাঞ্জা দাহন কাৰ্যসূচী। এই কাৰ্যসূচীৰ দ্বাৰা বিগত সময়ত বিশ্বনাথ জিলা আৰক্ষীয়ে অভিযান চলাই জব্দকৃত গাঞ্জাসমূহ আজি দাহন কৰা হয়। বিশ্বনাথ জিলা আৰক্ষীয়ে আন্তঃৰাষ্ট্ৰীয় ড্ৰাগছ বিৰোধী দিনৰ দিনাই ইতিমধ্যে অবৈধ ব্ৰাউন ছুগাৰ,গাঞ্জা, নিচাজাতীয় টেবলেট, হেৰ’ইনসহ আন নিচা জাতীয় সামগ্ৰী বিশ্বনাথৰ এই পানীভৰালতে দাহ কৰিছিল। বিশ্বনাথ জিলা আৰক্ষীয়ে বিগত সময়ত জিলাখনৰ বিভিন্ন প্ৰান্তৰ পৰা অভিযান চলাই জব্দ কৰা সেই নিচা জাতীয় সামগ্ৰীসমূহৰ মূল্য আছিল প্ৰায় ডেৰ কোটি টকা। কিন্তু আজি দেশৰ গৃহমন্ত্ৰী অমিত শ্বাহৰ আহ্বানত পুনৰ আজি বিশ্বনাথৰ পানীভৰালত দাহ কৰে জিলাখনৰ পৰা শেহতীয়াকৈ অভিযান চলাই জব্দ কৰা ২০ কেজি ৭০০ গ্ৰাম অবৈধ গাঞ্জা। যাৰ মূল্য পাঁচ লাখ টকাতকৈ অধিক হ’ব। এই দাহন কাৰ্যসূচীত উপস্থিত থাকে বিশ্বনাথ জিলাৰ আৰক্ষী অধীক্ষক নবিন সিং, বিশ্বনাথ জিলাৰ অতিৰিক্ত উপায়ুক্ত ইলিমা কুণ্ডুল লানা, অতিৰিক্ত আৰক্ষী অধীক্ষক কুলেন্দ্ৰ নাথ ডেকা, উপ-আৰক্ষী অধীক্ষক জয়ন্ত বৰুৱা, জিলা আবকাৰী বিষয়া দীপেন বৰা, স্বাস্থ্য বিষয়া তথা চিকিৎসক নৃপেন শইকীয়া, ভাৰপ্ৰাপ্ত আৰক্ষী বিষয়া ছামদান হাজুৱালীসহ বিশ্বনাথ জিলা আৰক্ষী প্ৰশাসনৰ উচ্ছ পদস্থ বিষয়াসকল।