বিশ্বনাথঃ ক’ৰোনা মহামাৰীৰ সংহাৰী ৰূপৰ বাবে সমগ্ৰ বিশ্বৰ লগতে ভাৰততো নাগৰিকে দীৰ্ঘ সময় ঘৰতে আৱদ্ধ হৈ থাকিব লগীয়া হৈছে৷ লক-ডাউনৰ বাবে আন একাংশ লোকে নিজৰ ঘৰৰ পৰা অইন ঠাইত আৱদ্ধ হৈ থাকিব লগীয়া হৈছিল৷ কিন্তু চৰকাৰে লক-ডাউন শিথিল কৰি দিয়াত বহিঃৰাজ্য তথা বহিঃৰাষ্ট্ৰত আৱদ্ধ লোকসকলে পৰ্যায়ক্ৰমে নিজ ৰাজ্যলৈ উভতি আহিছে৷ নিজ ৰাজ্যলৈ উভতি অহা লোকসকলে প্ৰশাসনে সাজু কৰি ৰখা কোৱাৰাণ্টাইন চেণ্টাৰত ১৪ দিনৰ বাবে কোৱাৰাণ্টাইন হ’বলগীয়াত পৰিছে৷ এই লোকসকলে হঠাতে এক এবাঞ্চিত পৰিবেশত কোৱাৰাণ্টাইন হ’বলগীয়া হোৱাত সমস্যাত পৰিছে যদিও একাংশ লোকে কোৱাৰাণ্টাইন চেণ্টাৰত ৰং-ধেমালি কৰি সময় পাৰ কৰাৰ ভিডিঅ’ ছ’চিয়েল মিডিয়াত প্ৰচাৰ হৈ আহিছে৷ আনহাতে আন একাংশ লোকে কোৱাৰাণ্টাইন চেণ্টাৰত খাদ্যকে ধৰি আন আন সুবিধা লাভ নকৰাৰ অভিযোগ উত্থাপন কৰি তাণ্ডৱ চলোৱাৰ ভিডিঅ’ ছ’চিয়েল মিডিয়াত ভাইৰেল হৈছে৷

বিশেষকৈ বহিঃৰাজ্যৰ পৰা অসমলৈ উভতি অহা যুৱক-যুৱতীসকলক নিজ নিজ এলেকাৰ স্কুল-কলেজ সমূহত কোৱাৰাণ্টাইনত ৰখা হৈছে। কোৱাৰাণ্টাইন চেণ্টাৰসমূহৰ পৰা বহু খবৰ প্ৰচাৰ হৈ আহিছে যদিও ৰাজ্যৰ এটা কোৱাৰাণ্টাইন চেণ্টাৰত ক’ৰোনা মহামাৰীক প্ৰত্যাহ্বান জনাই নিতৌ সংস্কৃতিৰ আখৰা কৰা পৰিলক্ষিত হৈছে৷ বিশ্বনাথৰ জিনজিয়া মহাবীৰ হাইস্কুলৰ কোৱাৰাণ্টাইন চেণ্টাৰত পুৱা-গধুলি সংগীতৰ চৰ্চা চলিছে৷ যুৱকসকলে হাতত ঢোল, তাল, খোল, বাঁহী লৈ হৰি নাম, বিহুৰ আখৰা চলাই৷

বিশ্বনাথৰ জিনজিয়া মহাবীৰ হাইস্কুলৰ কোৱাৰাণ্টাইন চেণ্টাৰত নিতৌ দেখা পোৱা যায় ব্যতিক্ৰমি সংগীতৰ সাধনা কৰাৰ দৃশ্য৷ কোৱাৰাণ্টাইন চেণ্টাৰ সমূহত খাদ্য যোগাৰ ধৰাৰ নামত তাণ্ডৱ চলোৱাৰ বাতৰি প্ৰকাশ হৈছে যদিও বিশ্বনাথৰ জিনজিয়া মহাবীৰ হাইস্কুলৰ কোৱাৰাণ্টাইন চেণ্টাৰৰ গীত-মাত বাজি উঠা ছবিখনে সকলো কোৱাৰাণ্টাইন হৈ থকা লোকক মনোৰঞ্জন দি ঘৰ খনৰ পৰা আতৰি থকাৰ কথা পাহৰি এপাক নাচিবলৈ, হাত তালি বজাবলৈ ওলাই আহিবলৈ বাধ্য কৰে৷ এয়া সম্পূৰ্ণ ব্যতিক্ৰমী ৰূপ। চেণ্টাৰত থকা প্ৰতিগৰাকী ব্যক্তি হৈ পৰিছে বৰ্তমান একো একোজন সংগীতৰ সাধক। পুৱা গধুলি চেণ্টাৰটোতে ঢোল, খোল, তাল, বাঁহীৰ লগতে হৰি নাম আৰু বিহু নামেৰে মুখৰিত হৈ পৰে। কোৱাৰাণ্টাইন হৈ থকা লোকসকলে আপোনা পাহৰা হৈ কোৱাৰাণ্টাইন চেণ্টাৰত হাঁহি-স্ফূৰ্তিৰে সময় অতিবাহিত কৰিছে৷