বিশ্বনাথঃ ৰাজ্যত দ্ৰুত গতিত ক’ৰোনাৰ সংক্ৰমণ বৃদ্ধি হোৱাৰ সময়তে ৰাজ্যত চোৰাং চিকাৰীয়ে অপকাণ্ড সংঘটিত কৰিবলৈ জাল পেলোৱাৰ কাণ্ড পোহৰলৈ আহিছে৷ এদিন পূৰ্বে জখলাবন্ধাৰ আৰক্ষী আৰু পুব কাৰ্বি আংলং জিলাৰ আৰক্ষীয়ে চোৰাং চিকাৰীয়ে গঁড় হত্যাৰ পৰিকল্পনা বিফল কৰাৰ ১২ ঘণ্টাৰ পিছতে পুনৰ চোৰাং চিকাৰী আৰক্ষীৰ জালত পৰিছে৷ যৌথ অভিযানত নগাঁও আৰু কাৰ্বি আংলং জিলাৰ ভিন্ন স্থানৰ পৰা ৪জন চোৰাং চিকাৰী গ্ৰেপ্তাৰ কৰিবলৈ সক্ষম হোৱাৰ পিছতে এইবাৰ বিশ্বনাথৰ বাঘমাৰীত চোৰাং চিকাৰী গ্ৰেপ্তাৰ কৰিবলৈ সক্ষম হয় নিৰাপত্তাৰক্ষীয়ে৷

ৰাজ্যত চোৰাং চিকাৰীয়ে দৌৰাত্ম অব্যাহত ৰখাৰ সময়তে ৰাষ্ট্ৰীয় উদ্যান কাজিৰঙাত গঁড় হত্যাৰ পৰিকল্পনা ৰচনা কৰি থকা এজন চোৰাং চিকাৰীক নিৰাপত্তাৰক্ষীয়ে জালত পেলাবলৈ সক্ষম হয়৷

বনকৰ্মীৰ তৎপৰতাৰ বাবে গঁড় হত্যাৰ ষড়যন্ত্ৰ বিফল কৰাৰ লগতে চোৰাং চিকাৰীক জালত পেলাই বুধবাৰে৷ এক গোপন সুত্ৰ পম খেদি জিনজিয়া আৰক্ষীয়ে অৰ্ধসামৰপিক বাহিনীৰ সহায়ত চলোৱা যৌথ অভিযানত বাঘমাৰীত এজন চোৰাং চিকাৰীক গ্ৰেপ্তাৰ কৰিবলৈ সক্ষম হয়৷

জিনজিয়া আৰক্ষীয়ে বিশ্বনাথৰ বাঘমাৰীত গ্ৰেপ্তাৰ কৰিবলৈ সক্ষম হোৱা হেকমত আলিৰ পৰা ৩০৩ ৰাইফলৰ মেগজিন, ৫ জাই সজীৱ গুলী, বন্দুকৰ এটা ট্ৰিগাৰ আৰু এডাল চাইলেন্সাৰ জব্দ কৰিবলৈ সক্ষম হয়৷ চোৰাং চিকাৰী হিকমতৰ ঘৰৰ পিছফালে মৰাপাটৰ ঠাৰিৰ দ’মৰ লুকুৱাই ৰাখিছিল অস্ত্ৰ-শস্ত্ৰসমূহ৷ আৰক্ষী আৰু এছ এছ বিৰ যুটীয়া অভিযানত অস্ত্ৰ-শস্ত্ৰসমূহ উদ্ধাৰ হয়৷ জিনজিয়া আৰক্ষীয়ে ৭৫/২০ নম্বৰত গোচৰ ৰুজু কৰি তদন্ত অব্যাহত ৰাখিছে৷