নিউজ ডেস্কঃ অসমত আঞ্চলিক শক্তিক পুনৰ উদ্ধাৰৰ চেষ্টা আজিৰে পৰা আৰম্ভ হৈছে৷ ৰাজ্যসভাৰ সাংসদ অজিত কুমাৰ ভূঞাৰ আহ্বানক্ৰমে আজি গুৱাহাটীত জাতীয় চিন্তা-চেতনাৰ লগত জড়িত কেবাটাও দল-সংগঠনৰ প্ৰতিনিধি একত্ৰিত হৈ এখন মঞ্চ গঠন কৰে৷ সাংসদ অজিত ভূঞাই স্কাই নিজউ অসমৰ প্ৰতিনিধিক জনোৱা মতে ২০২১ চনৰ বিধানসভা নিৰ্বাচনত শাসনাধিষ্ঠিত বিজেপি আৰু অগপক উৎখাত কৰি নতুন এক আঞ্চলিক শক্তিক শাসনলৈ অনাৰ ক্ষেত্ৰত এই মঞ্চই কাম কৰিব৷

ইতিমধ্যে আজি ১১ জনীয়া এখন সমিতি গঠন কৰা হৈছে৷ অজিত কুমাৰ ভূঞাৰ নেতৃত্বত অদীপ কুমাৰ ফুকন, হলিৰাম তেৰাং, কমল নাৰায়ণ চৌধুৰী, ৰফিউল হুছেইন বৰুৱা, অনুপ বৰুৱা আৰু দুলু গগৈক আহ্বায়ক আৰু লাচিত বৰদলৈ, মনজিৎ মহন্ত, শান্তনু বৰঠাকুৰক সমন্বয়ক হিচাপে লৈ গঠন কৰা সমিতিখনে সন্মানীয় সদস্য হিচাপে হাইদৰ হুছেইন, নেকিবুৰ জামান আৰু মীৰা বৰঠাকুৰক জড়িত কৰিছে৷

এই সমিতিখনে পৰৱৰ্তী বৈঠকত জাতীয়তাবাদী শিবিৰক একত্ৰিত কৰা মঞ্চখনৰ নাম আৰু কৰ্মসূচী ঘোষণা কৰিব৷ মঞ্চই অসমৰ জনজীৱনত শেহতীয়াভাৱে সাম্প্ৰদায়িক শক্তিসমূহৰ উত্থানৰ বিষয়টোক গভীৰ উৎকণ্ঠাৰে খেদ প্ৰকাশ কৰে আৰু ২০২১ চনৰ বিধানসভা নিৰ্বাচনত বিজেপিমুক্ত এখন চৰকাৰ গঠন কৰিবলৈ আজিৰ দিনটোৰ পৰাই প্ৰস্তুতি চলোৱা বুলি জানিবলৈ দিয়ে৷

‘আপুনি মুখ্যমন্ত্ৰী পদৰ প্ৰাৰ্থী নেকি’ বুলি সাংসদ অজিত কুমাৰ ভূঞাক কৰা প্ৰশ্নৰ উত্তৰত সাংসদজনে কয় যে সেয়া এক বহুত দূৰৈৰ কথা৷ বৰ্তমান সময়ত আমি আঞ্চলিকতাবাদী শক্তিসমূহক একত্ৰিত কৰাৰ বাবে চেষ্টা চলাম৷ তেখেত নিজেই সমুখৰ পৰা থাকি যুঁজ দিব বুলি উল্লেখ কৰি ভূঞাই কয় যে বিজেপি আৰু অগপৰ ক্ষেত্ৰত আমাৰ স্পষ্ট নীতি এয়াই যে তেওঁলোকৰ নেতৃত্বত থকা চৰকাৰখনৰ নেতিবাচক বিষয়সমূহ আমি ৰাইজৰ আগত উদঙাই দিম৷

কংগ্ৰেছ আৰু এআইইউডিএফৰ লগত আপোনালোকৰ সম্পৰ্ক কেনে হ’ব বুলি সোধা এক প্ৰশ্নৰ উত্তৰত ভূঞাই কয় যে সেইবোৰ বিষয় এতিয়াও আলোচনা হোৱা নাই৷ কিন্তু বিজেপিক উৎখাত কৰাৰ ক্ষেত্ৰত আমি সময়ত কৌশলপূৰ্ণ স্থিতি গ্ৰহণ কৰাৰ কথাটো নুই কৰিব নোৱাৰো৷ আমাৰ মূল কথাটো হ’ল অসমক বচাবলৈ হ’লে জাতীয়তাবাদী শিবিৰৰ উত্থান হ’বই লাগিব৷ ভূঞাই লগতে অহা বিধানসভা নিৰ্বাচনৰ ৰণ কৌশল প্ৰস্তুত কৰাৰ বাবে শীঘ্ৰেই আন এখন সমিতি গঠন কৰা হ’ব বুলিও জানিবলৈ দিয়ে৷