গুৱাহাটীঃ ‘বিটিচি নিৰ্বাচনত কোনো ৰাজনৈতিক দলৰ সৈতে ভাৰতীয় জনতা পাৰ্টিৰ মিত্ৰতা নহয়। বিটিচিবাসী ৰাইজৰ লগত মিত্ৰতাত আবদ্ধ হৈ দলে নিৰ্বাচনত অৱতীৰ্ণ হ’ব।’-শীঘ্ৰে বিটিচি নিৰ্বাচন অনুষ্ঠিত হোৱাৰ এক ইংগিত প্ৰদান কৰি ছ’চিয়েল মিডিয়াযোগে এই মন্তব্য কৰিছে মঙলদৈ লোকসভা সমষ্টিৰ বিজেপিৰ সাংসদ দিলীপ শইকীয়াই।

ছ’চিয়েল মিডিয়াত আপলোড কৰা এটি ভিডিঅ’ত সাংসদগৰাকীয়ে কয় যে একাংশ ৰাজনৈতিক দলে বিজেপিয়ে তেওঁলোকৰ সৈতে লগ হৈ নিৰ্বাচনত অৱতীৰ্ণ হ’ব বুলি সংবাদ মাধ্যমত প্ৰচাৰ চলাইছে যদিও সেয়া শুদ্ধ নহয়। পূৰ্বৰ মিত্ৰদল বিপিএফৰ লগত এইবাৰ কোনোধৰণৰ মিত্ৰতা অবিহনেই বিটিচি নিৰ্বাচনত অৱতীৰ্ণ হ’ব বুলিও স্পষ্ট কৰি দিয়ে সাংসদ শইকীয়াই।

‘বিপিএফৰ সৈতে আমাৰ এইবাৰ কোনো মিত্ৰতা নহয়। ইউপিপিএলৰ সৈতেও আমাৰ মিত্ৰতাৰ প্ৰশ্ন উঠিব নোৱাৰে। আমি অঞ্চলটোত আমাৰ যি সাংগঠনিক শক্তি আছে সেই শক্তিৰেই অৱতীৰ্ণ হ’ব। আমাৰ মূল লক্ষ্য সবকা সাথ সবকা বিকাশ আৰু সবকা বিশ্বাসক বাস্তৱ ৰূপ দিবলৈকে আমি অঞ্চলটোত কাম কৰি যাম। ৰাইজৰ ওপৰত আমাৰ আস্থা আছে। আমাক ৰাইজে আদৰি ল’ব।’-সাংসদগৰাকীয়ে কয়।

উল্লেখ্য যে বিটিএডিত ৰাজ্যপালৰ শাসন প্ৰৱৰ্তনৰ পিছতে হাগ্ৰামা মহিলাৰী নেতৃত্বাধীন বিপিএফ দলে মুকলিকৈ আক্ৰমণৰ লক্ষ্য কৰি লৈছিল বিধানসভা নিৰ্বাচনৰ মিত্ৰদল বিজেপিক। এই লৈ বিজেপিৰ তৰফৰ পৰা কোনো স্পষ্ট প্ৰতিক্ৰিয়া প্ৰকাশ পোৱা নাছিল যদিও সাংসদ শইকীয়াই কৰা এই মন্তব্যৰ পিছতে বিষয়টো স্পষ্ট হৈ পৰিছে যে বিগত নিৰ্বাচনসমূহৰ তুলনাত এইবাৰৰ বিটিচি নিৰ্বাচনৰ সমীকৰণ সম্পূৰ্ণ সুকীয়া আৰু আকৰ্ষণীয় হৈ পৰিব।

ইফালে, ৰাজনৈতিক পৰ্যবেক্ষকসকলৰ মতে বিটিএডি নিৰ্বাচনৰ বাবে ইতিমধ্যে সুদীৰ্ঘ কাল ধৰি শাসন চলাই অহা হাগ্ৰামাৰ বিপিএফক পৰাভূত কৰিবলৈ এইবাৰ ককালত টঙালি বান্ধিছে ইউপিপিএলে। একেদৰে কংগ্ৰেছ আৰু এআইইউডিএফ দলেও সুকীয়া সুকীয়াকৈ নিৰ্বাচনত অৱতীৰ্ণ হোৱাৰ কথা ঘোষণা কৰিছে। ইয়াৰ লগতে বিগত প্ৰায় ৪ বছৰৰ মিত্ৰদল বিপিএফ আৰু বিজেপিয়েও যদিহে পৃথকে পৃথকে নিৰ্বাচনত অৱতীৰ্ণ হয় তেন্তে অঞ্চলটোৰ ৰাজনীতি অনাগত দিনত কোন দিশে গতি কৰে সেয়া সময়েহে ক’ব।