বিটিচিত বলিছে নিৰ্বাচনী গৰম বতাহঃ বিপিএফত যোগদান ৰঞ্জন দৈমাৰীৰ ভগ্নী অঞ্জলীৰ
- Update Time : Monday, August 24, 2020
- 170 Time View
ওদালগুৰিঃ বিটিচিত নিৰ্বাচনী গৰম বতাহ বলি থকাৰ সময়তে সোমবাৰে বিপিএফত যোগদান কৰিলে বড়ো ওমেন জাষ্টিছ ফ’ৰামৰ নেত্ৰী তথা প্ৰাক্তন এনডিএফবি ৰঞ্জন দৈমাৰীৰ ভগ্নী অঞ্জলী দৈমাৰীয়ে। সোমবাৰে ওদালগুৰিৰ জিলা বিপিএফ কাৰ্যালয়ত অনুষ্ঠিত হোৱা যোগদান অনুষ্ঠানত অঞ্জলী দৈমাৰীয়ে বিপিএফত আনুষ্ঠানিকভাৱে যোগদান কৰে।
বিপিএফৰ এই যোগদান সভাত উপস্থিত থাকে বিটিচি প্ৰধান হাগ্ৰামা মহিলাৰী আৰু মন্ত্ৰী ৰিহণ দৈমাৰীৰ লগতে বিপিএফৰ কেইবাগৰাকীও নেতা-কৰ্মী। ইফালে নিৰ্বাচনৰ পূৰ্বে অঞ্জলী দৈমাৰীৰ বিপিএফত যোগদানে এতিয়া বিটিচিত তীব্ৰ চৰ্চা লাভ কৰিছে।
উল্লেখ্য যে, হাগ্ৰামা মহিলাৰীৰ বিৰুদ্ধে দুৰ্নীতিৰ অভিযোগ সৰৱ হৈ পৰাৰ সময়ত মহিলাৰীয়ে নিৰ্বাচনী বৈতৰণী পাৰ হ’বলৈ এতিয়া বিভিন্ন সূত্ৰ প্ৰয়োগ কৰিবলগা হৈছে। অঞ্জলী দৈমাৰীৰ লগত পূৰ্বে নীতিগত কাৰণত সংঘাত থকা হাগ্ৰামা মহিলাৰীয়ে ক্ষমতাকেন্দ্ৰিক ৰাজনীতিৰ স্বাৰ্থতে এতিয়া তেওঁক বিপিএফত আদৰণি জনাইছে বুলি প্ৰমোদ বড়ো পন্থীৰ বড়ো জনগোষ্ঠীৰ একাংশ নেতাই অভিযোগ কৰিছে।
