গুৱাহাটীঃ দীৰ্ঘদিনে অসুস্থ হৈ থকা বিজেপিৰ যুৱ নেতা অশ্বিনী কুমাৰ চেতিয়াৰ বৃহস্পতিবাৰে নিশা গুৱাহাটীৰ হেলথ চিটি চিকিৎসালয়ত চিকিৎসাধীন অৱস্থাত মৃত্যুক আকোৱালি লয়৷ চিকিৎসাধীন অৱস্থাত মৃত্যুক আকোৱালি লোৱা অশ্বিনী কুমাৰ চেতিয়াৰ মৃতদেহ নিশাই গুৱাহাটীৰ পৰা শিৱসাগৰৰ ঘৰলৈ নি শুকুৰবাৰে দিনৰ ভাগত শেষকৃত্য সম্পাদন কৰা হয়৷ নেতাগৰাকীৰ মৃত্যুত ৰাজ্যত শোকৰ ছাঁ পৰিছে৷

১৯৭০ চনত ঐতিহ্যমণ্ডিত শিৱসাগৰৰ হাঁহচৰাৰ নপাম চেতিয়া গাঁৱত জন্মগ্ৰহণ কৰা অশ্বিনী কুমাৰ চেতিয়াই টাই আহোম ছাত্ৰ সন্থা চমুকৈ আটাছুৰ সৈতে ছাত্ৰ অৱস্থাৰ পৰাই জড়িত হৈ আছিল। পিছলৈ তেওঁ সংগঠনটোৰ সভাপতি আৰু মুখ্য উপদেষ্টা পদত বহু বছৰ ধৰি কাৰ্যনিৰ্বাহ কৰিছিল। সংগঠনটোৰ মুখ্য উপদেষ্টা পদত থাকি ৰাজ্যৰ জটিল সমস্যা তথা নাগৰিকত্ব সংশোধনী আইনৰ বিৰুদ্ধে ৰাজপথৰ আন্দোলনৰ দায়িত্ব লৈছিল৷ ইয়াৰ মাজতে তেওঁ বিজেপি দলত যোগদান কৰি ৰাজনৈতিক যাত্ৰা আৰম্ভ কৰিছিল৷

প্ৰাক্তন জাতীয়তাবাদী তথা বিজেপিৰ যুৱ নেতাগৰাকীৰ মৃত্যুত ৰাজ্যত শোকৰ ছাঁ পৰাৰ লগতে বিভিন্ন দল-সংগঠনে নেতাগৰাকীৰ মৃত্যুত শোক প্ৰকাশ কৰিছে৷ সদৌ অসম ছাত্ৰ সন্থা, অসম জাতীয়তাবাদী যুৱ-ছাত্ৰ পৰিষদকে ধৰি ৰাজ্যৰ সকলো জাতীয় দল-সংগঠনে অশ্বিনী চেতিয়াৰ মৃত্যুত শোক প্ৰকাশ কৰি পৰিয়ালক সবেদনা জ্ঞাপন কৰিছে৷

ৰাজ্য মুখ্যমন্ত্ৰী সৰ্বানন্দ সোণোৱালে বিদেপিৰ নেতাগৰাকীৰ মৃত্যুত শোক প্ৰকাশ কৰে৷ মুখ্যমন্ত্ৰী সৰ্বানন্দ সোণোৱালে সামাজিক মাধ্যম যোগে শোক প্ৰকাশ কৰি কয় ‘‘আটাছুৰ প্ৰাক্তন মুখ্য উপদেষ্টা তথা সভাপতি, ছাত্ৰনেতা আৰু ভাৰতীয় জনতা পাৰ্টিৰ কাৰ্যকৰ্তা অশ্বিনী কুমাৰ চেতিয়াৰ আকস্মিক বিয়োগত গভীৰ শোক প্ৰকাশ কৰিছো। তেখেতৰ বিদেহ আত্মাৰ চিৰশান্তি কামনা কৰি শোকসন্তপ্ত পৰিয়ালবৰ্গলৈ সমবেদনা জনালো।’’

আনহাতে ৰাজ্য চৰকাৰৰ মন্ত্ৰী বিজেপিৰ জ্যেষ্ঠ নেতা ড০ হিমন্ত বিশ্ব শৰ্মাই টুইচ কৰি গভীৰ শোক প্ৰকাশ কৰে৷ মন্ত্ৰী হিমন্তই টুইট কৰি কয় ‘‘সদৌ টাই আহোম ছাত্ৰ সন্থাৰ প্ৰাক্তন সভাপতি তথা মুখ্য উপদেষ্টা, যুৱ নেতা অশ্বিনী কুমাৰ চেতিয়া ডাঙৰীয়াৰ অকাল বিয়োগত মৰ্মাহত হৈছো। তেখেতৰ বিয়োগ ৰাজ্যখনৰ বাবে অপূৰণীয় ক্ষতি। প্ৰয়াত চেতিয়া দেৱৰ বিদেহ আত্মাৰ চিৰশান্তি কামনা কৰি শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিলো।’’