গুৱাহাটীঃ বিগত ২৪ ঘণ্টাত ৰাজ্যত ১৭২৪গৰাকী ক’ৰোনা ৰোগী সুস্থ হৈ ঘৰলৈ গৈছে৷ ৰাজ্যৰ বিভিন্ন চিকিৎসালয় তথা কোভিড হস্পিতালত ভৰ্তি হৈ চিকিৎসা কৰি থকা ১৭২৪গৰাকী ক’ৰোনা ৰোগী সম্পূৰ্ণ আৰোগ্য হৈ স্বাভাৱিক জীৱন লাভ কৰিছে৷ আনহাতে বিগত ২৪ ঘণ্টাত ৰাজ্যত ১৯৭৩গৰাকী ক’ৰোনা ৰোগী ধৰা পৰিছে৷ ইয়াৰে কামৰূপ মহানগৰৰ ৫১০গৰাকী, কাছাৰৰ ১৪৯গৰাকী, যোৰহাটৰ ১৩২গৰাকী, কামৰূপৰ ১২১গৰাকী আৰু ডিব্ৰুগড়ৰ ১১৬গৰাকী লোক ধৰা পৰিছে৷

ৰাজ্যৰ স্বাস্থ্য বিভাগে ৩৪,৩০৭টা পৰীক্ষণ কৰাত ইয়াৰে ১৯৭৩গৰাকী ক’ৰোনা ৰোগী ধৰা পেলাইছে৷ ৰাজ্যৰ স্বাস্থ্যমন্ত্ৰী ড০ হিমন্ত বিশ্ব শৰ্মাই টুইট কৰি জাৰি কৰা তথ্য মতে, মঙলবাৰৰ দিনটোত ৰাজ্যত ক’ৰোনা ৰোগী ধৰা পৰাৰ শতাংশ আছিল ৫.৭৫ শতাংশ৷ ৰাজ্যত বৰ্তমান ৯৪ হাজাৰ ৫০০জনলৈ বৃদ্ধি পাইছে মুঠ ৰোগীৰ সংখ্যা৷ ৭৩ হাজাৰ লোক বৰ্তমানলৈ সুস্থ হৈছে৷ ২১ হাজাৰ ৰোগী বৰ্তমানেও চিকিৎসাধীন হৈ থকাৰ লগতে ২৬০গৰাকী লোকৰ এই পৰ্যন্ত মৃত্যু হয়৷

মঙলবাৰে নিশা ৰাজ্যৰ স্বাস্থ্যমন্ত্ৰী ড০ হিমন্ত বিশ্ব শৰ্মাই টুইট কৰি জাৰি কৰা তথ্য মতে, ৰাজ্যত ক’ৰোনাত আক্ৰান্ত হৈ পুনৰ ৮গৰাকী লোকৰ মৃত্যু হৈছে৷ এই ৮গৰাকী লোকৰ মৃত্যু বিগত ২৪ ঘণ্টাত হৈছে আৰু চিকিৎসাধীন অৱস্থাত হৈছে৷

কামৰূপ মহানগৰ জিলাৰ উশা দাস (৭০), অৰ্পনা ৰয় (৪৮), নয়না দাস (২১), নলবাৰী জিলাৰ লাৱন্য ভূঞা (৬৫), বাক্সা জিলাৰ মচফিল হুছেইন (৫৫), পাহাৰীয়া জিলা কাৰ্বি আংলং জিলাৰ অজয় কুমাৰ গুপ্তা (৪০), গোলাঘাট জিলাৰ জাণ্টু দেৱ (৪৬) আৰু মাজুলীৰ বিষ্ণু বিশ্বাসৰ (৫৫) বিগত ২৪ ঘণ্টাত মৃত্যু হৈছে৷