ডিজিটেল ডেস্কঃ বাল্য বিবাহৰ বিৰুদ্ধে ৰাজ্যত অভিযান অব্যাহত ৰাখিছে আৰক্ষীয়ে৷ বে-আইনী স্বামীক গ্ৰেপ্তাৰ কৰিছে আৰক্ষীয়ে৷ মুখ্যমন্ত্ৰীৰ নিৰ্দেশত অসম আৰক্ষীয়ে ৰাজ্যজুৰি বাল্য বিবাহ বিৰোধী অভিযান অব্যাহত ৰাখিছে৷ বাল্য বিবাহ বিৰোধী অভিযানৰ মাজতে ন্যায়ালয়ৰ ৰোষত পৰিবলগীয়া হৈছে অসম আৰক্ষী৷ বাল্য বিবাহৰ অভিযুক্তৰ বিৰুদ্ধে পক্‌ছ’ৰ দৰে কঠোৰ আইনৰ ধাৰা আৰোপ কৰাত গুৱাহাটী উচ্চ ন্যায়ালয়ৰ ভৰ্ৎসনাৰ সন্মুখীন হৈছে অসম আৰক্ষী৷

গুৱাহাটী উচ্চ ন্যায়ালয়ৰ ন্যায়াধীশ সুমন শ্যামে বাল্য বিবাহ প্ৰতিৰোধী আইন-২০০৬, পক্‌ছ’ আইনৰ ধাৰা আৰু ধৰ্ষণৰ আইপিচি ধাৰা ৩৭৬(৩) আৰোপিত গোচৰৰ কেইবাজনো অভিযুক্তৰ মঙলবাৰে জামিন মঞ্জুৰ কৰে৷ ধৰ্ষণৰ আইপিচি ধাৰা ৩৭৬(৩)ত গোচৰ ৰুজু হোৱা নগাঁৱৰ চামচুল হক নামৰ অভিযুক্তজনৰ অন্তৱৰ্তীকালীন জামিন মঞ্জুৰ কৰি মঙলবাৰে উচ্চ ন্যায়ালয়ৰ বিচাৰপীঠে বাল্য বিবাহৰ গোচৰত ধৰ্ষণৰ অভিযোগ নুঠাকৈ আই পি চি ৩৭৬(৩) ধাৰা আৰোপ কৰা কাৰ্যত ক্ষুব্ধ হৈ পৰে৷ অসম আৰক্ষীক ককৰ্থনা কৰি ন্যায়াধীশ শ্যামে বাল্য বিবাহৰ গোচৰত ধৰ্ষণৰ কোনোৱে অভিযোগ কৰিছে নেকি বুলিও চৰকাৰী পক্ষক প্ৰশ্ন কৰে৷ ধৰ্ষণৰ অভিযোগ নকৰিলে আই পি চি ৩৭৬(৩) ধাৰা কিয় আৰোপ কৰা হৈছে বুলিও প্ৰশ্ন কৰে ন্যায়ালয়ে৷

ন্যায়াধীশ সুমন শ্যামৰ বিচাৰপীঠে একে ধৰণৰ বাল্য বিবাহৰ জামিন সম্পৰ্কীয় গোচৰত বাল্য বিবাহৰ অভিযুক্তৰ বিৰুদ্ধে পক্‌ছ’ আইনৰ ধাৰা আৰোপ কৰাক লৈ আৰক্ষীক প্ৰশ্ন কৰে৷ চৰকাৰী পক্ষক ককৰ্থনা কৰি ন্যায়াধীশ শ্যামে কয়–‘অভিযুক্তই যদি বাল্য বিবাহৰ আইন উলংঘন কৰিছে, তেনেহ’লে আইনে নিজৰ পথ নিজেই ল’ব৷ বাল্য বিবাহ অতীজৰে পৰা হৈ আহিছে৷ আদালতে এতিয়া কেৱল বিবেচনা কৰিব অভিযুক্তক তাৎক্ষণিকভাৱে জিম্মাত লৈ প্ৰেৰণ কৰি জেৰাৰ প্ৰয়োজনীয়তা আছে নে নাই৷ এই মুহূৰ্তত আদালতে বিবেচনা কৰে যে বাল্য বিবাহৰ এনে গোচৰৰ অভিযুক্তক জিম্মাত লৈ জেৰা কৰাৰ কোনো প্ৰয়োজনীয়তা নাই৷ আমি জবানবন্দী লিপিবদ্ধ কৰিবলৈহে নিৰ্দেশ দিম৷ কিয়নো এই গোচৰ এন ডি পি এছ, চোৰাং সৰবৰাহ বা সম্পত্তি চুৰিৰ গোচৰ নহয়৷ লক্ষণীয়ভাৱে চৰকাৰী পক্ষৰ অধিবক্তাই বাল্য বিবাহৰ গোচৰত পক্‌ছ’ আইনৰ ধাৰা আৰোপ কৰাৰ যুক্তি দাঙি ধৰিছিল যদিও ন্যায়াধীশ শ্যামে ইচ্ছা কৰিলেই যিকোনো গোচৰতে পক্‌ছ’ আইনৰ ধাৰা আৰোপ কৰিলে নহ’ব বুলিও সকীয়াই দিয়ে৷