তিনিচুকীয়াঃ বিগত ২৭ মে’ত বাঘজানৰ ৫ নং তৈলখাদত সংঘটিত বিস্ফোৰণত ফলত অস্বাভাৱিক তেল আৰু গেছ নিৰ্গমন আৰু পৰৱৰ্তী সময়ত অগ্নিকাণ্ডৰ ফলত হোৱা বন্যপ্ৰানী, জৈৱবৈচিত্ৰ, বায়ু, পানীৰ গুনগত মানদণ্ড তথা বন আৰু পৰিৱেশৰ ওপৰত হোৱা অন্যান্য ক্ষয়-ক্ষতিৰ পৰিমাণ নিৰূপণৰ বাবে এজনীয়া তদন্ত সমিতি গঠন কৰি অতিৰিক্ত প্ৰধান মুখ্য বন সংৰক্ষক এম কে যাদৱক দায়িত্ব অৰ্পণ কৰিছিল।

উক্ত সমিতিখনে অঞ্চলটোত সকলোধৰণৰ ক্ষয় ক্ষতিৰ লগতে সকলো সমস্যাৰ সম্পৰ্কে জনসাধাৰণৰ তথা দল-সংগঠনৰ পৰা মতামত গ্ৰহন কৰিবলৈ তিনিচুকীয়া আৱৰ্ত্ত ভৱনত ২৬ জুনৰ পৰা ২৮ জুনলৈ তিনিদিনিয়াকৈ এক গণ শুনানিৰ আয়োজন কৰিছিল।

দেওবাৰে সদৌ মৰাণ ছাত্ৰ সন্থা, অসম জাতীয়তাবাদী যুৱ ছাত্ৰ পৰিষদ, সদৌ তিনিচুকীয়া জিলা ছাত্ৰ সন্থা, মটক যুৱ ছাত্ৰ সন্মিলন, চাহ জনজাতি ছাত্ৰ সন্থা, গোৰ্খা ছাত্ৰ সন্থাৰ অৰ্ধশতাধিক নেতৃত্বই গণ শুনানীত অংশগ্ৰহণ কৰি অইল ইণ্ডিয়া লিমিটেডে ভৱিষ্যতে পৰিৱেশ সংবেদনশীল, আৰু জনবাসতিপূৰ্ণ এলেকাৰ ভিতৰত খনন কাৰ্য্য বন্ধ কৰা, ক্ষতিগ্ৰস্থ সকলো পৰিয়াল সকলোধৰণৰ ক্ষতিপূৰণ প্ৰদান কৰাৰ লগতে মতাপুং-মাগুৰি বিল আৰু ডিব্ৰুছৈখোৱা ৰাষ্ট্ৰীয় উদ্যানৰ জীৱকুলৰ সুৰক্ষা কৰা, অইল ইণ্ডিয়া লিমিটেডৰ যিকোনো কাম কাজ, পৰিত্যক্ত খাদ সমূহত সম্পূৰ্ণৰূপে সুৰক্ষাৰ ব্যৱস্থা কৰিবলৈ এইজনীয়া সমিতিখনৰ জৰিয়তে আহ্বান জনায়।

ইফালে ৰাজ্যত চলি থকা অভাৱনীয় বান পৰিস্থিতিৰ বাবে এজনীয়া সমিতিয়ে আয়োজন কৰা গণ শুনানিত বাঘজানবাসী ৰাইজ তথা নিকটৱৰ্তী অঞ্চলসমূহৰ জনসাধাৰণ অংশগ্ৰহণ কৰিব পৰা নাই। সেয়ে ৰাইজে সম্পূৰ্ণৰূপে অভাৱ-অভিযোগ তথা সমস্যাসমূহ দাঙি ধৰিব পৰাকৈ পুনৰ দ্বিতীয় পৰ্যায়ৰ গণ শুনানি আয়োজন কৰিবলৈ দাবী জনাইছে দল-সংগঠনৰ নেতৃত্বই।