নুমলীগড়ঃ বহু বল্কী মন্ত্ৰী অতুল বৰাৰ সমষ্টিৰ দুৰ্দশাৰ কথা কৈ শেষ কৰিব নোৱাৰি৷ লক-ডাউনৰ সময়ত নিজ সমষ্টিৰ নাগৰিকৰ খবৰ নলৈ লক-ডাউন খুলি দিয়াৰ সময়ত তিনমাহৰ মূৰকত খাদ্য বিতৰণ কৰিবলৈ খেদা খাব লগা হৈছে খোদ মন্ত্ৰী অতুল৷ বছৰৰ পিছত বছৰ ধৰি এটা বান্ধ নিৰ্মাণ কৰিব নোৱাৰাত কৃষকে কেঁচা ধান ঘৰলৈ চপাই আনিব লগা হৈছে৷ মন্ত্ৰী অতুল বৰাৰ বিফলতাৰ উদাহৰণ দি শেষ কৰিব নোৱাৰি৷ সমষ্টিত এতিয়া অকৰ্মণ্য মন্ত্ৰী ৰূপে বিখ্যাত হৈ পৰিছে এইগৰাকী মন্ত্ৰী৷ এইবাৰ চৰ্চালৈ আহিছে অতুল বৰাৰ সমষ্টিৰ এটা পথ৷ যিটো পথ বাৰিষা-শৰালী বোকা-পানীৰে ভৰি থাকে৷ কেতিয়াও পথটোত এচপৰা মাটি পৰা নাই৷

বোকা আৰু পানীৰ মাজেৰে ৰাজপথত খোজ কাঢ়িবলৈ বাধ্য হৈ পৰিছে৷ একাঠু পানী বোকাৰ মাজত জীয়াই থাকিবলগীয়া হৈছে বোকাখাট বিধানসভা সমষ্টিৰ দিচৈ পঞ্চায়তত৷ নুমলীগড়ৰ মহৰামুখ-গুটুং পথৰ দুৰৱস্থাই জ্বলা-কলা খুৱাইছে ৰাইজক। স্থানীয় বিধায়ক তথা কৃষিমন্ত্ৰী অতুল বৰাৰ খবৰ নাই। খবৰ নাই বিভাগীয় কৰ্তৃপক্ষৰ। এজাক বৰষুণৰ ফলতেই জলমগ্ন হৈ পৰে পথ। বছৰ বছৰ ধৰি কদৰ্যময় পথেৰে প্ৰায় কুৰিখন গাঁৱৰ লোকে অহা-যোৱা কৰিবলগীয়া হৈছে। মিচিং জনবসতিপূৰ্ণ অঞ্চলৰ লোকসকলে কেইবাবাৰ পথটো নিৰ্মাণ কৰিবলৈ দাবী জনাই আহিছে যদিও মন্ত্ৰী তথা বিধায়ক অতুল বৰাই কেতিয়াও গুৰুত্ব প্ৰদান কৰা দেখা নাযায়৷ ২০খন গাঁৱৰ প্ৰায় ২০ হাজাৰ লোকৰ একমাত্ৰ যোগাযোগৰ মাধ্যম পথটোৰ অৱস্থাই নৰক যন্ত্ৰণা ভোগাই আহিছে পথচাৰীক।