যোৰহাটঃ পৰীক্ষাৰ ফলাফল ঘোষণাৰ কেইটামান ঘণ্টাৰ পিছতে উজনি অসমৰ এগৰাকী মেধা ছাত্ৰীয়ে আত্মহত্যা কৰাৰ ঘটনাই ৰাজ্যত তীব্ৰ চাঞ্চল্যৰ সৃষ্টি কৰিছে৷ শনিবাৰে ঘোষণা কৰা হাইস্কুল শিক্ষান্ত পৰীক্ষাৰ ফলাফল ঘোষণা কৰাৰ পিছতে যোৰহাট জিলাৰ যোৰহাটৰ বাল্য ভৱনৰ ছাত্ৰী তথা হাইস্কুল শিক্ষান্ত পৰীক্ষাৰ পৰীক্ষাৰ্থী কংকিতা বৰাই ছিপ লৈ আত্মহত্যা কৰে৷ কালি ঘোষণা কৰা হাইস্কুল শিক্ষান্ত পৰীক্ষাত যোৰহাট জয়া নগৰৰ কংকিতাই প্ৰথম বিভাগত উত্তীৰ্ণ হৈছিল৷ জীৱনৰ প্ৰথমটো প্ৰতিযোগিতামূলক জখলাত বিচৰা মতে সফল হ’ব নোৱাৰি কংকিতাই চূড়ান্ত সিদ্ধান্ত লোৱা বুলি চৰ্চা হৈছে৷

প্ৰথম বিভাগত উত্তীৰ্ণ হ’বলৈ সক্ষম হোৱা কংকিতা বৰাই ৬৩শতাংশ নম্বৰসহ এটা বিষয়ত লেটাৰ লাভ কৰিছিল৷ প্ৰকৃততে কংকিতাই কিমান উন্নত ফলাফল আশা কৰিছিল সেই কথা জানিব পৰা হোৱা নাই৷ পৰিয়ালে এতিয়ালৈ কোনো কথা স্পষ্ট কৰা নাই৷ কংকিতাই পৰিয়ালৰ লোকে বিচৰা মতে ফলাফল কৰিব পৰা নাছিল নে নিজে বিচৰা ধৰা উন্নত ফলাফল কৰিব পৰা নাছিল সেই কথাও পোহৰলৈ অহা নাই৷ প্ৰকৃততে কাৰ চাপ আছিল কংকিতাৰ ওপৰত৷ যাৰ ফলত এগৰাকী মেধা ছাত্ৰীয়ে জীৱনৰ প্ৰথমটো প্ৰতিযোগিতামূলক জখলাত উঠিয়েই চূড়ান্ত সিদ্ধান্ত ল’ব লগা হ’ল৷ সন্দেহ কৰা মতে, কংকিতাৰ পৰা পৰিয়ালৰ লোকে অধিক উন্নত ফলাফল আশা কৰিছিল৷ পৰিয়ালে বিচৰা মতে ফলাফলত উপনীত হ’ব নোৱাৰাৰ বাবে চাপ পৰিছিল কংকিতাৰ ওপৰত৷ শনিবাৰে বিয়লি জয়া নগৰস্থিত নিজ ঘৰত ছিপ লৈ থকা অৱস্থাত মৃতদেহ উদ্ধাৰ হয়।