পংকজ নাথঃ প্ৰথমবাৰৰ বাবে আয়োজিত কামৰূপ জিলা দিৱস-২০২২ৰ আজি সফল সমাপ্তি ঘটে। শেষ দিনটোৰ কাৰ্যসূচীৰে আমিনগাঁৱৰ কুমাৰ ভাস্কৰ বৰ্মন ক্ষেত্ৰ মুখৰিত হৈ পৰে৷ বাৰে ৰহনীয়া সাংস্কৃতিক অনুষ্ঠানে মুহিত কৰে কেইবা শ লোকক৷ চাৰিদিনীয়া বৰ্ণাঢ্য কাৰ্যসূচীৰে অনুষ্ঠিত কামৰূপ জিলা দিৱসৰ আজি অন্তিম দিনটোত বৰ্ণিল কাৰ্যাসূচী ৰূপায়ন কৰা পৰিলক্ষিত হৈছে৷ আজি অন্তিম দিনটোত জিলাখনৰ বিভিন্ন দিশ সামৰি যুগুতোৱা তথ্যচিত্ৰ ‘কামৰূপ-এক অনিৰুদ্ধ যাত্ৰা’ আনুষ্ঠানিকভাৱে মুকলি কৰা হয়৷ তথ্যচিত্ৰখন মুকলি কৰি সাংসদ ভুৱনেশ্বৰ কলিতাই জিলা দিৱসৰ অনুষ্ঠানত জিলাখন সন্দৰ্ভত তথ্যচিত্ৰ প্ৰস্তুত কৰাত জিলা প্ৰশাসনৰ শলাগ লয়৷ আগন্তুক দিনত জিলাখন সকলো ক্ষেত্ৰতে আদৰ্শ জিলাৰূপে প্ৰতিষ্ঠা লাভ কৰিবলৈ সক্ষম হ’ব বুলি আশা প্ৰকাশ কৰে৷ আজি শিক্ষা বিভাগে অনুষ্ঠিত কৰা এক সভাত জিলাখনৰ শ্ৰেষ্ঠ প্ৰাথমিক বিদ্যালয় পৰিচালনা সমিতি আৰু শ্ৰেষ্ঠ মাতৃ গোটসমূহক বঁটা প্ৰদান কৰা হয়৷ অনুষ্ঠানত মুখ্য অতিথিৰ আসন অলংকৃত কৰে পূব কামৰূপ মহাবিদ্যালয়ৰ অৱসৰী অধ্যাপক খগেন তালুকদাৰে আৰু বিশিষ্ট অতিথি ৰূপে উপস্থিত থাকে দদৰা উচ্চতৰ মাধ্যমিক বিদ্যালয়ৰ অৱসৰী অধ্যক্ষ পৰেশ বৈশ্যই৷ আজিৰ অন্য এক আকৰ্ষণীয় অনুষ্ঠান দৰ্শক কুইজ প্ৰতিযোগিতা৷ বিশিষ্ট কুইজ মাষ্টাৰ দীপাংকৰ কৌশিকে পৰিচালনা কৰা মনোগ্ৰাহী দৰ্শক কুইজ প্ৰতিযোগিতাত ভাগ লৈ উপস্থিত সকলোৱে উপকৃত হয় আৰু আনন্দ লাভ কৰে৷ কথাছবি প্ৰদৰ্শন শিতানত সোণৰ বৰণ পখী আৰু নিষিদ্ধ নদী কথাছবি প্ৰদৰ্শন কৰা হয়৷ সন্ধিয়া বিভিন্ন সাংস্কৃতিক অনুষ্ঠান প্ৰদৰ্শন কৰা হয়৷ আজিৰ সাংস্কৃতিক অনুষ্ঠানৰ বিশেষ আকৰ্ষণ হৈছে বিশিষ্ট কণ্ঠশিল্পী নেকিব হুছেইনৰ গীতৰ শৰাই আৰু বিশিষ্ট নৃত্য বিশাৰদ হেমন্ত কুমাৰ কলিতাৰ কথক নৃত্য পৰিবেশন কৰা হয়৷