দুধনৈঃ পেলনীয়া প্লাষ্টিকে পৰিৱেশ প্ৰদূষিত কৰাৰ অভিযোগ নতুন নহয়৷ প্লাষ্টিকে যথেষ্ট পৰিমাণে পৰিবেশ প্ৰদূষিত কৰাৰ লগতে মাটিৰ উৰ্বৰা শক্তি হ্ৰাস কৰাৰ অভিযোগ উত্থাপন হৈ আহিছে৷ তেনে সময়তে পেলনীয়া প্লাষ্টিকেৰে পথ নিৰ্মাণ কৰি মানৱ সমাজক ভয়াবহ বিপদৰ পৰা ৰক্ষা কৰিবলৈ প্ৰচেষ্টা চলাইছে ৰাজ্যৰ গড়কাপ্তানী বিভাগে৷ বিভাগটোৱে নতুন কাৰিকৰী পদ্ধতি অৱলম্বন কৰাত অসমৰ বিভিন্ন প্ৰান্তৰ লগতে দুধনৈ বিধানসভা সমষ্টিত যোগাযোগ ব্যৱস্থাৰ স্থায়ী সমাধান কৰিবলৈ সক্ষম হৈছে৷

ইতিমধ্যে পেলনীয়া প্লাষ্টিকেৰে দুধনৈ সমষ্টিত বহু কেইটা পথ নিৰ্মাণ কৰা পৰিলক্ষিত হৈছে৷ পুনৰ ২০১৮-১৯ বৰ্ষৰ পঞ্চম বিৰ্ত্তীয় আয়োগৰ পুঁজিৰে দুধনৈ সমষ্টিৰ মাখিপাৰাত ১৭নং ৰাষ্ট্ৰীয় ঘাইপথ-শিয়ালমাৰী পথ ১৩০০ মিটাৰ দৈৰ্ঘৰ পথটো পেলনীয়া প্লাষ্টিকেৰে উন্নীতকৰণ কৰা হ’ব৷ নিৰ্মাণকাৰ্যৰ কামৰ শুভাৰম্ভ কৰে বিধায়ক দীপক কুমাৰ ৰাভাই৷

৩৪ লাখ ৭২ হাজাৰ টকা ব্যয় সাপেক্ষে পুনঃনিৰ্মাণ কৰিব লগা পথটো বিটুমিনৰ লগতে পেলনীয়া প্লাষ্টিক ব্যৱহাৰ কৰি নিৰ্মাণ কৰা হ’ব বুলি বিধায়কজনে জানিবলৈ দিয়ে৷ ফলত পথটোৰ আয়ুস আন পথতকৈ যথেষ্ট বেছি হ’ব বুলিও কয় বিধায়কজনে৷ পথ শুভাৰম্ভ অনুষ্ঠানত দুধনৈ গড়কাপ্তানী সংমণ্ডলৰ কাৰ্যবাহী অভিযন্তা পৰশমণি ঠাকুৰীয়া, কনিষ্ট অভিযন্তা উৎপল খাখলাৰী, বিশিষ্ট সমাজকৰ্মী গৌৰীশংকৰ ৰাভাৰ লগতে স্থানীয় বহু বিশিষ্ট ব্যক্তি উপস্থিত থাকে৷