নাজিৰাঃ যোৱা দুদিন আগত তিনিচুকীয়া জিলাৰ বাঘজানত অইল ইণ্ডিয়া লিমিটেডৰ তৈলক্ষেত্ৰত হোৱা ভয়ংকৰ অগ্নিকাণ্ডৰ প্ৰভাৱত পৰা বাঘজান অঞ্চলটো পৰিভ্ৰমণ কৰিবলৈ যোৱা অসম চৰকাৰৰ মাননীয় মন্ত্ৰী চন্দ্ৰমোহন পাটোৱাৰী ডাঙৰীয়াৰ সৈতে একেলগে উপস্থিত থকা ৰামেশ্বৰ তেলী ডাঙৰীয়াই ৰাইজৰ স্বাস্থ্যক আওকাণ কৰি এক সাংঘাটিক ঘটনা সংঘটিত কৰিলে।

কিয়নো তেখেতে এই ঘটনাৰ মাত্ৰ দুদিন আগত দিল্লীৰ পৰা অসমলৈ আহিছিল আৰু চৰকাৰে বান্ধি দিয়া পৃথকীকৰণৰ নীতি নিৰ্দেশনা উলংঘা কৰি মাত্ৰ দুদিন পৃথকীকৰণ কেন্দ্ৰত উপস্থিত থাকি উক্ত আনুষ্ঠানিক পৰিদৰ্শনত অংশগ্ৰহণ কৰিছিল। তেতিয়ালৈ তেখেতৰ ক’ভিড১৯ সম্বন্ধীয় স্বাস্থ্য পৰীক্ষাৰ ফলাফল ও অহা নাছিল। মোৰ প্ৰশ্ন যে, ৰাজ্য চৰকাৰ আৰু কেন্দ্ৰীয় চৰকাৰে বান্ধি দিয়া পৃথকীকৰণৰ নীতি নিৰ্দেশনা উলংঘা কৰা মাননীয় কেন্দ্ৰীয় মন্ত্ৰী তথা সাংসদ তেলী ডাঙৰীয়াৰ ওপৰত চৰকাৰ আৰু প্ৰশাসনে যাৱতীয় ব্যৱস্থা গ্ৰহণ কৰিব নে শাসকীয় পক্ষৰ হোৱাৰ বাবে তেখেতৰ ৭ খুন মাফ হ’ব?

ইয়াৰ উপৰিও ৰাজ্যৰ মাননীয় স্বাস্থ্য মন্ত্ৰী ডাঙৰীয়াই মিডিয়াৰ আগত ডাঙৰ ডাঙৰ ঘোষণা কৰি আহিছে যে, পৃথকীকৰণৰ নিয়ম উলংঘা কৰা সকলৰ ওপৰত চৰকাৰে কঠোৰ ভাৱে অনুশাসন মূলক ব্যৱস্থা গ্ৰহণ কৰিব, গতিকে মাননীয় স্বাস্থ্য মন্ত্ৰী ডাঙৰীয়াৰ ওচৰত মোৰ অনুৰোধ, তেখেতে অতিশীঘ্ৰে পৃথকীকৰণৰ নিয়ম উলংঘা কৰি ৰাইজৰ মাজত সংমিশ্ৰণ হোৱা কেন্দ্ৰীয় মন্ত্ৰী তথা সাংসদ ৰামেশ্বৰ তেলী ডাঙৰীয়াৰ ওপৰত কঠোৰ ব্যৱস্থা গ্ৰহণ কৰি দৃষ্টান্ত মূলক শাস্তি প্ৰদান কৰে যেন।