গোলাঘাটঃ ৰাজ্যৰ মুখ্যমন্ত্ৰী সৰ্বানন্দ সোণোৱালে দুৰ্নীতিৰ বিৰুদ্ধে শূন্য সহনশীল নীতি অৱলম্বন কৰাৰ কথা উল্লেখ কৰি আহিলেও ৰাজ্যৰ বিভিন্ন প্ৰান্তত ব্যাপক হাৰত দুৰ্নীতি সংঘটিত হৈ অহাৰ সময়ে সময়ে অভিযোগ উত্থাপন হৈ আহিছে৷ বিশেষকৈ ৰাজ্যখনৰ পঞ্চায়তসমূহত ব্যাপক দুৰ্নীতি সংঘটিত হোৱাৰ অভিযোগ উত্থাপন হৈ অহাৰ মাজতে গোলাঘাট জিলাৰ সৰুপথাৰ বিধানসভা সমষ্টিৰ পূৱ বৰপথাৰ গাওঁ পঞ্চায়তত দুৰ্নীতি সংঘটিত হোৱা বুলি উত্থাপিত অভিযোগৰ তদন্ত কৰাৰ নিৰ্দেশ দিছে মুখ্যমন্ত্ৰী সৰ্বানন্দ সোণোৱালে৷

খোদ শাসকীয় দলৰে একাংশ নেতা-কৰ্মীয়ে পঞ্চায়তত দুৰ্নীতি সংঘটিত হোৱাৰ অভিযোগ উত্থাপন কৰাৰ পিছতে মুখ্যমন্ত্ৰী সোণোৱালে গুৰুত্বসহকাৰে লৈছে এই অভিযোগক৷ দুৰ্নীতি সংঘটিত হোৱাত ৰাইজ জাঙুৰ খাই উঠাৰ লগতে মুখ্যমন্ত্ৰী সোণোৱালে তদন্ত ঘোষণা কৰাত পঞ্চায়তবাসী তথা বিজেপিৰ নেতা-কৰ্মীয়ে মুখ্যমন্ত্ৰীৰ শলাগ লয়৷

মুখ্যমন্ত্ৰীৰ কাৰ্যালয়ৰ নিৰ্দেশ মৰ্মে ইতিমধ্যে পঞ্চায়ক খনত সংঘটিত দুৰ্নীতিৰ তদন্ত আৰম্ভ হৈছে৷ মুখ্যমন্ত্ৰী কাৰ্যালয়ৰ নিৰ্দেশ অনুসৰি সোমবাৰৰ পৰা তদন্ত আৰম্ভ হৈছে৷ গোলাঘাট দক্ষিন উন্নয়ন খণ্ডৰ খণ্ড উন্নয়ন বিষয়া দ্বিজেন বৰাৰ নেতৃত্বত এটা দলে পঞ্চায়তখনত তদন্ত আৰম্ভ কৰিছে৷ উল্লেখ্য যে শাসনাধিষ্ট বিজেপি দলৰ সদস্যৰে গঠিত পূৱ বৰপথাৰ গাওঁ পঞ্চায়তৰ সভাপতি দেবানন্দ শইকীয়াই ৱাৰ্ড সদস্যসকলক আন্ধকাৰত ৰাখি পঞ্চায়ত সচিব জাকিৰ হুছেইনৰ লগত মিলি ব্যাপক দুৰ্নীতিত লিপ্ত হোৱাৰ অভিযোগ উত্থাপন কৰিছিল খোদ বিজেপি দলৰে নিৰ্বাচিত আন একাংশ ৱাৰ্ড সদস্যই৷

পঞ্চায়তখনৰ নিৰ্বাচিত ১০ জন ৱাৰ্ড সদস্যৰ ভিতৰত ৯ জনেই অনাস্থা প্ৰস্তাৱো উত্থাপন কৰিছিল সভাপতি দেৱানন্দ শইকীয়াৰ বিৰুদ্ধে৷ অভিযোগ অনুসৰি সভাপতি দেবানন্দ শইকীয়া আৰু সচিব জাকিৰ হুছেইনে পঞ্চায়তৰ বাবে আৱণ্টিত ধন নিজ ইচ্ছা অনুসৰি খৰচ কৰিছে৷ বহু আঁচনিৰ কাম নকৰাকৈয়ে আৰু বহু আঁচনিৰ কিঞ্চিৎ কাম কৰিয়েই ধন উলিয়াইছে সভাপতিগৰাকেীয়ে৷ এই ক্ষেত্ৰত ৱাৰ্ড সদস্যসকলে প্ৰতিবাদ কৰিলেও সভাপতিগৰাকীয়ে অশ্লীল গালি গালাজেৰে সদস্যসকলক অপমান কৰি অহাৰ অভিযোগ উত্থাপন কৰিছে ৱাৰ্ড সদস্যসকলে৷